തിരുവനന്തപുരം: അകാലത്തിൽ പൊലിഞ്ഞ സഹപാഠിയുടെ കുടുംബത്തെ സഹായിക്കാൻ യൂണിവേഴ്സിറ്റി കോളജിലെ പൂർവ വിദ്യാർത്ഥികളും കലാകാരന്മാരും ഒന്നിക്കുന്നു. നാളെ വൈകിട്ട് 5.30ന് ടാഗോർ തിയറ്ററിലാണ് ഫ്രണ്ട്സ് ഫെസ്റ്റിവൽ നടക്കുന്നത്.
1996-2001 കാലഘട്ടത്തിൽ യൂണിവേഴ്സിറ്റി കോളേജിൽ പഠിച്ച അലൻ വെസ്ലിയുടെ അകാലമരണവും കുടുംബത്തിന്റെ ദുരിതങ്ങളുമാണ് സുഹൃത്തുക്കളെ ഒന്നിക്കാൻ പ്രേരിപ്പിച്ചത്. അലന്റെ കുടുംബത്തെ സഹായിക്കാനായി തങ്ങൾക്ക് കഴിയുന്ന തുക ഇതിനകം ശേഖരിച്ചു. അതിനുപുറമേയാണ് സൗഹൃദ സന്ധ്യയും കലാവിരുന്നും സംഘടിപ്പിച്ച് കൂടുതൽ തുക സമാഹരിക്കുന്നത്. ഗായകനും സംഗീത സംവിധായകനുമായ ജാസി ഗിഫ്റ്റാണ് പ്രോഗ്രാമിന്റെ കോ ഒാർഡിനേറ്റർ. ഗായകർ, നർത്തകർ, മിമിക്രി താരങ്ങൾ, അഭിനേതാക്കൾ തുടങ്ങിയവർ പങ്കെടുക്കും. പൂർവ വിദ്യാർത്ഥികളുടെ കൂട്ടായ്മ തയ്യാറാക്കിയ സുവനീറിന്റെ പ്രകാശനവും നടക്കും. മന്ത്രിമാർ, എം.എൽ.എമാർ, തദ്ദേശ സ്ഥാപന പ്രതിനിധികൾ, സാമൂഹിക സാംസ്‌കാരിക രംഗത്തെ പ്രമുഖർ തുടങ്ങി നിരവധി പേർ പങ്കെടുക്കും.