ആറ്റിങ്ങൽ: യാത്രയ്ക്കിടെ കെ.എസ്.ആർ.ടി.സി ബസിനുള്ളിൽ നിന്ന് വനിതാ കണ്ടക്ടറുടെ ടിക്കറ്റ്‌റാക്കും പണവും രേഖകളുമടങ്ങിയ ബാഗ് മോഷണം പോയി. ആറ്റിങ്ങൽ ഡിപ്പോയിലെ കണ്ടക്ടർ ജി.ആർ.ജയശ്രീയുടെ ബാഗാണ് തിരുവനന്തപുരത്തു നിന്ന് ആറ്റിങ്ങലേക്ക് വന്ന ആർ.എസ്.ഇ 127ാം നമ്പർ ബസിൽ നിന്ന് മോഷണം പോയത്. ടിക്കറ്റ് മെഷീൻ തകരാറിലായാൽ ഉപയോഗിക്കുന്നതിനായി സൂക്ഷിച്ചിരുന്ന റാക്കിൽ രണ്ടുലക്ഷം രൂപ വിലയുളള ടിക്കറ്റുകളുണ്ടായിരുന്നു. പണമടങ്ങിയ പഴ്‌സ്, ആധാർകാർഡ്, കണ്ടക്ടർ ലൈസൻസ്, എ.ടി.എം കാർഡ്, ടിക്കറ്റ് മെഷീന്റെ ചാർജർ, ഭക്ഷണം, വസ്ത്രം എന്നിവ ബാഗിലാക്കി ഡ്രൈവറുടെ സമീപത്തായി ബോണറ്റിൽ വച്ചിരുന്നതാണ്. ബസ് രാവിലെ 8 ഒാടെ ആറ്റിങ്ങൽ ഡിപ്പോയിലെത്തുമ്പോഴാണ് ബാഗ് നഷ്ടപ്പെട്ട വിവരമറിയുന്നത്. ആറ്റിങ്ങൽ പൊലീസ് കേസെടുത്തു. നഷ്ടമായ ടിക്കറ്റിന്റെ തുക കോർപ്പറേഷനിൽ അടയ്‌ക്കേണ്ടിവരുമെന്ന പേടിയിലാണ് ജയശ്രീ.