തിരുവനന്തപുരം: ഇൻഫർമേഷൻ പബ്ലിക് റിലേഷൻസ് വകുപ്പിന്റെ ആഭിമുഖ്യത്തിൽ 'മാദ്ധ്യമദിനം 2020' ഇന്നും നാളെയുമായി ഹോട്ടൽ അപ്പോളോ ഡിമോറയിൽ നടക്കും. ബംഗാൾ ഗസറ്റ് പ്രസിദ്ധീകരണം ആരംഭിച്ച ദിവസമെന്ന നിലയിലാണ് മാദ്ധ്യമദിനം സംഘടിപ്പിക്കുന്നത്. ഇന്ന് വൈകിട്ട് 3.30ന് സ്പീക്കർ പി.ശ്രീരാമകൃഷ്ണൻ ഉദ്ഘാടനം ചെയ്യും. വി.എസ്. ശിവകുമാർ എം.എൽ.എ അദ്ധ്യക്ഷത വഹിക്കും. ഇന്ത്യയിലെയും കേരളത്തിലെയും എഡിറ്റർമാർ ഉൾപ്പെടെയുള്ള മാദ്ധ്യമപ്രവർത്തകർ വിവിധ സെഷനുകളിൽ പങ്കെടുക്കും. രാവിലെ 10ന് ആരംഭിക്കുന്ന ശില്പശാലയിൽ മാദ്ധ്യമപ്രവർത്തകനും എഴുത്തുകാരനുമായ ജോസി ജോസഫ് എക്‌സ്‌ക്ലൂസീവുകൾ വന്ന വഴിയെക്കുറിച്ച് സംസാരിക്കും. 12 മുതൽ ഒരു മണി വരെ മാതൃഭൂമി എഡിറ്റർ മനോജ് കെ.ദാസ് മീറ്റ് ദ എഡിറ്റർ പരിപാടിയിൽ പങ്കെടുക്കും. ചാനലുകളിലെ വനിതാ മാദ്ധ്യമ പ്രവർത്തകർ പങ്കെടുക്കുന്ന ബ്രേക്കിംഗ് ന്യൂസ് പരിപാടി ഉച്ചയ്ക്ക് രണ്ടു മുതൽ നടക്കും. നാളെ രാവിലെ 10ന് പിക്‌സ് സ്‌റ്റോറി എക്‌സിക്യൂട്ടീവ് എഡിറ്റർ ജയന്ത് ജേക്കബ് 'മാറുന്ന ലോകത്തെ മാദ്ധ്യമപ്രവർത്തനത്തെക്കുറിച്ച്' മാദ്ധ്യമ വിദ്യാർത്ഥികളോടു സംസാരിക്കും. ഉച്ചയ്ക്ക് 12 മുതൽ ഇംഗ്ലീഷ് മാദ്ധ്യമ പ്രവർത്തനത്തിലെ സാദ്ധ്യതകളെക്കുറിച്ച് ചർച്ച നടക്കും. രണ്ടു മുതൽ കേരളത്തിലെ മുതിർന്ന മാദ്ധ്യമ പ്രവർത്തകരും മാദ്ധ്യമ വിദ്യാർത്ഥികളുമായുള്ള ആശയവിനിമയം നടക്കും.