കിളിമാനൂർ: പൊതുജനാരോഗ്യ സേവന രംഗത്ത് മാതൃകമായി പുളിമാത്ത് ഗവ. ആയുർവേദ ആശുപത്രി. ഒരു കുടക്കീഴിൽ ആയുർവേദത്തിലെ എല്ലാ ചികിത്സയും ലഭ്യമാക്കുക എന്ന ലക്ഷ്യത്തോടെ നിരവധി ചികിത്സാ രീതികളാണ് ഇവിടെ നടപ്പിലാക്കുന്നത്. കിളിമാനൂർ ബ്ലോക്കിന് കീഴിലെ പുളിമാത്ത് പഞ്ചായത്തിൽ സ്ഥിതി ചെയ്യുന്ന ഈ ആശുപത്രിയിൽ കഴിഞ്ഞ ദിവസം നേത്ര രോഗ വിഭാഗവും, അസ്ഥി രോഗവിഭാഗവും തുടങ്ങിയതോടെ എല്ലാ ചികിത്സയും ലഭ്യമാക്കുന്ന ജില്ലയിലെ തന്നെ ആദ്യ ആയുർവേദ ആശുപത്രിയായി മാറിയിരിക്കുകയാണ് പുളിമാത്ത് ഗവ. ആയുർവേദ ആശുപത്രി. ഇതോടൊപ്പം പുളിമാത്ത് പഞ്ചായത്ത് ജനങ്ങൾക്ക് എല്ലാവിധ ചികിത്സയും ലഭ്യമാക്കുന്ന ഗ്രാമ പഞ്ചായത്തായി മാറുകയുമാണ്. ബി. സത്യൻ എം.എൽ.എയുടെയും പുളിമാത്ത് പഞ്ചായത്തിന്റെയും ശ്രമഫലമായി കഴിഞ്ഞ നാല് വർഷക്കാലമായി നിരവധി വികസന പദ്ധതികളും, വിവിധ തരത്തിലുള്ള ചികിത്സാ പദ്ധതികളുമാണ് ഇവിടെ നടപ്പിലാക്കിയിട്ടുള്ളത്. ഇതോടെ പ്രതിദിനം ഇരുന്നൂറിൽ പരം ആളുകളാണ് ചികിത്സയ്ക്കായി ഇവിടെ എത്തുന്നത്. പഴയ കെട്ടിടത്തിൽ നിന്ന് പുതിയ കെട്ടിടത്തിലേക്ക് മാറിയതോടെ കിടത്തി ചികിത്സ ഉൾപ്പെടെയുള്ളവയ്ക്ക് സൗകര്യവുമായി. എല്ലാ വിധ ചികിത്സാ രീതികളും വന്നതോടെ ഇവിടത്തെ ജനങ്ങളും സന്തോഷത്തിലാണ്.