വെഞ്ഞാറമൂട്: കേരള സ്‌റ്റേറ്റ് കർഷകത്തൊഴിലാളി യൂണിയൻ ജില്ലാ സമ്മേളനം ഫെബ്രുവരി 5 മുതൽ 8 വരെ വെഞ്ഞാറമൂട്ടിൽ നടക്കും. 5ന് ആർ. കുഞ്ഞുകൃഷ്ണപിള്ള സ്മൃതി മണ്ഡപത്തിൽ നിന്ന് ജില്ലാ കമ്മിറ്റി അംഗം ഷാജഹാന്റെ നേതൃത്വത്തിൽ കൊടിമര ജാഥയും പള്ളിക്കൽ അജയന്റെ സ്മൃതി മണ്ഡപത്തിൽ നിന്ന് ജില്ലാ വൈസ് പ്രസിഡന്റ് ഗണേശന്റെ നേതൃത്വത്തിൽ പതാക ജാഥയും ജീവൻ കുമാറിന്റെ സ്മൃതി മണ്ഡപത്തിൽ നിന്ന് ജില്ലാ ജോ. സെക്രട്ടറി ദിനേശ്കുമാറിന്റെ നേതൃത്വത്തിൽ ദീപശിഖയും വൈകിട്ട് 5ന് സമ്മേളന നഗരിയിൽ എത്തിച്ചേരും. വിവിധ ഏരിയിൽ നിന്നുള്ള ദീപശിഖ റാലികളും സമ്മേളന നഗറിൽ എത്തിച്ചേരും. വൈകിട്ട് 6ന് ലെനിൻ രാജേന്ദ്രൻ നഗറിൽ സന്തോഷ് ബാബുവിന്റെ നേതൃത്വത്തിലുള്ള നാടൻപാട്ട്. 6 ന് രാവിലെ എം.എം. മുസ്തഫ നഗറിൽ പ്രതിനിധി സമ്മേളനം. രാവിലെ 9 ന് രജിസ്ട്രേഷൻ, 9.30 ന് രക്തസാക്ഷി മണ്ഡപത്തിൽ പുഷ്പാർച്ചന. 9.45 ന് പതാക ഉയർത്തൽ, 10ന് പ്രതിനിധി സമ്മേളനം കെ.എസ്.കെ.ടി.യു സംസ്ഥാന പ്രസിഡന്റ് എം.വി. ഗോവിന്ദൻ ഉദ്ഘാടനം ചെയ്യും. വൈകിട്ട് 6ന് സ്വരാജ്ഭവൻ ഹാളിൽ സെമിനാർ. ഫെബ്രുവരി 7 ന് രാവിലെ 9 മുതൽ പ്രതിനിധി സമ്മേളനം തുടർച്ച. വൈകിട്ട് 6ന് സ്വരാജ്ഭവൻ ഹാളിൽ കവിയരങ്ങ്. ഫെബ്രുവരി 8 ന് വൈകിട്ട് 5 ന് രാമാനന്ദൻ നഗറിൽ (വെഞ്ഞാറമൂട് ജംഗ്ഷൻ) നടക്കുന്ന പൊതുസമ്മേളനം എ. വിജയരാഘവൻ ഉദ്ഘാടനം ചെയ്യും.