ആ​റ്റിങ്ങൽ: വിവാദങ്ങൾക്കും വാഗ്ദാനങ്ങൾക്കും ഒടുവിൽ ആ​റ്റിങ്ങൽ നാലുവരിപ്പാതയുടെ നിർമ്മാണം ആരംഭിച്ചു. ബി.സത്യൻ എം.എൽ.എ നാളികേരം ഉടച്ചാണ് ഉദ്ഘാടനം നിർവഹിച്ചത്. ഔദ്യോഗികച്ചടങ്ങുകൾ ഒഴിവാക്കി നടത്തിയ ഉദ്ഘാടന ചടങ്ങും ഏറെ ശ്രദ്ധേയമായി. പൂവമ്പാറ മുതൽ മൂന്നുമുക്കുവരെയുളള ദേശീയപാത നാലുവരിയായി വികസിപ്പിക്കുന്നതാണ് പദ്ധതി. 2.8കിലോമീ​റ്റർ റോഡ് 16 മീ​റ്റർ വീതിയിലാണ് വികസിപ്പിക്കുന്നത്. 14 മീ​റ്റർ ടാറിംഗ് ഏരിയയാണ്. നടുക്ക് ഡിവൈഡറും വശങ്ങളിൽ ഓടയും നടപ്പാതയും ഉൾപ്പെടെയാണ് നിർമ്മാണം നടത്താൻ നിശ്ചയിച്ചിട്ടുള്ളത്. കിളിമാനൂർ കേന്ദ്രമായി പ്രവർത്തിക്കുന്ന റിവൈവ് കമ്പനിക്കാണ് നിർമ്മാണ കരാർ. 19 കോടി രൂപയാണ് അടങ്കൽ തുക. റോഡിൽ സ്ഥാപിക്കുന്നതിനുളള റെഡിമെയ്ഡ് ഓട ഉൾപ്പെടെയുള്ളവ കമ്പനിയുടെ യാഡിൽ നിർമ്മാണം പൂർത്തിയായിട്ടുണ്ട്. പദ്ധതിക്കായി നഗരത്തിലെ പുറമ്പോക്കുഭൂമിയും വിവിധ സർക്കാർ വകുപ്പുകളുടെ കൈവശമുള്ള ഭൂമിയും ഏ​റ്റെടുത്തിട്ടുണ്ട്. പോസ്‌​റ്റോഫീസിന്റെ ഭൂമി വിട്ടുകിട്ടുന്നതിനുളള നടപടികൾ പുരോഗമിക്കുകയാണെന്ന് അധികൃതർ പറഞ്ഞു. ഇന്നലെ നടന്ന ചടങ്ങിൽ ബി.സത്യൻ എം.എൽ.എ, നഗരസഭാ ചെയർമാൻ എം.പ്രദീപ്, മുൻ ചെയർ പേഴ്സൺ എസ്.കുമാരി, അവനവഞ്ചേരി രാജു, സന്തോഷ്‌കുമാർ, ആർ.രാമു, എന്നിവരും ദേശീയപാത, പൊതുമരാമത്തു വകുപ്പുകളിലെ ഉദ്യോഗസ്ഥരും പങ്കെടുത്തു.