മാനന്തവാടി: കൊയിലേരി ഉദയ വായനശാലയുടെ ആഭിമുഖ്യത്തിൽ മാനന്തവാടി ടീം ഉദയ ചാരിറ്റബിൾ ട്രസ്റ്റ് ഒരുക്കുന്ന അഖിലേന്ത്യ സെവൻസ് ഫുട്‌ബോൾ മേള ജനുവരി 24 മുതൽ മാനന്തവാടി ഹൈസ്‌കൂൾ ഗ്രൗണ്ടിലെ ഫ്ളഡ് ലിറ്റ് സ്‌റ്റേഡിയത്തിൽ ആരംഭിക്കും. 20 ദിവസം നീണ്ട് നിൽക്കുന്ന മത്സരത്തിൽ 20 അഖിലേന്ത്യ ടീമുകൾ മാറ്റുരയ്ക്കും.

കഴിഞ്ഞ 16 വർഷമായി ജീവകാരുണ്യ പ്രവർത്തനങ്ങളുടെ ഭാഗമായി നടത്തുന്നതാണ് ഉദയ ഫുട്‌ബോൾ. കഴിഞ്ഞ വർഷങ്ങളിൽ നിരവധി കിഡ്‌നി രോഗികൾ, കിടപ്പിലായ രോഗികൾ, നിർധനരായ 7 പെൺകുട്ടികളുടെ സമൂഹ വിവാഹം, നിർധനർക്ക് വീടും സ്ഥലവും തുടങ്ങി ഒട്ടനവധി സഹായങ്ങൾ ഉദയ ഫുട്‌ബോളിലൂടെ നൽകാൻ കഴിഞ്ഞതായി ഭാരവാഹികൾ പറഞ്ഞു. മേളയിൽ 80ൽ പരം വിദേശതാരങ്ങളും അണിനിരക്കും. 6000 പേർക്ക് ഇരിക്കാവുന്ന ഗ്യാലറിയാണ് ഹൈസ്‌ക്കൂളിൽ ഒരുക്കിയിരിക്കുന്നത്.

ഈ വർഷം ഉന്നത വിദ്യാഭ്യാസത്തിന് 50 കുട്ടികൾക്ക് പ്രോത്സാഹനം നൽകുന്ന പദ്ധതിയാണ് ഉദയ ആവിഷ്‌കരിക്കുന്നത്. എല്ലാ ദിവസവും മത്സരങ്ങളോടൊപ്പം കലാവിരുന്നുകളും ഒരുക്കിയിട്ടുണ്ട്. ആദ്യമായാണ് ഉദയ അഖിലേന്ത്യ ഫുട്‌ബോൾ ടൂർണ്ണമെന്റ് ഫ്‌ളഡ് ലിറ്റ് സ്റ്റേഡിയത്തിൽ സംഘടിപ്പിക്കുന്നത്.