ഹരിപ്പാട്: മദ്യലഹരിയിൽ വാട്ടർ ടാങ്കിനു മുകളിൽ കയറി അഭ്യാസം കാട്ടിയ യുവാവിനെ ഫയർഫോഴ്സെത്തി താഴെയിറക്കി. ആറാട്ടുപുഴ കള്ളിക്കാട് അകത്തു കായലിൽ സുമേഷാണ് (34) നാട്ടുകാരെയും ഫയർഫോഴ്സിനേയും മണിക്കൂറുകളോളം വട്ടം കറക്കിയത്. ഇന്നലെ വൈകിട്ട് ആറ് മണിയോടെയാണ് കളിക്കാട് എ.കെ.ജി നഗറിലുള്ള കുടിവെള്ള ടാങ്കിന്റെ മുകളിൽ ഇയാൾ കയറിയത്. ഇത് കണ്ട നാട്ടുകാരിൽ ചിലർ ടാങ്കിന് മുകളിൽ കയറി ഇറക്കാൻ ശ്രമിച്ചെങ്കിലും മദ്യപിച്ച് കുഴഞ്ഞ അവസ്ഥയിലായിരുന്നതിനാൽ സാധിച്ചില്ല.

തുടർന്ന് താഴേക്ക് വീണ് അപകടം ഉണ്ടാകാതിരിക്കാൻ ഇവർ ഇയാളുടെ കൈയും കാലും കൈലി ഉപയോഗിച്ച് ടാങ്കിനോടു ചേർത്ത് ബന്ധിച്ച ശേഷം ഫയർഫോഴ്സിനേയും പൊലീസിനേയും വിവരമറിയിക്കുകയായിരുന്നു. തൃക്കുന്നപ്പുഴ പൊലീസും ഹരിപ്പാട് നിന്നു ഫയർഫോഴ്സ് സംഘവും സ്ഥലത്തെത്തി. ഒന്നര മണിക്കൂറോളം പരിശ്രമിച്ചാണ് 8.10 ഓടെ വലയിൽ ഇയാളെ കെട്ടിയിറക്കിയത്.

താഴെയെത്തുമ്പോഴും ലക്കുകെട്ട അവസ്ഥയിലായിരുന്നു. സീനിയർ ഫയർ ആൻഡ് റെസ്ക്യു ഓഫീസർ ടി.ജി. മണിക്കുട്ടൻ, ഓഫീസർമാരായ ദീപാങ്കുരൻ, സജി, ബെന്നി രമാകാന്ത് ഹോംഗാർഡ് സുരേന്ദ്രൻ എന്നിവരാണ് രക്ഷാപ്രവർത്തനം നടത്തിയത്. ആവശ്യ സർവീസ് തടസപ്പെടുത്തിയെന്ന പേരിൽ ഇയാൾക്കെതിരെ കേസെടുത്തു