കുട്ടനാട്: മുട്ടാർ - നീരേ​റ്റുപുറം റോഡിൽ പഞ്ചായത്ത് ഓഫീസ് പടിമുതൽ നീരേ​റ്റുപുറം ജംഗ്ക്ഷൻ വരെ വെട്ടിപ്പൊളിച്ച് മെ​റ്റലിട്ടിട്ട് ഒരു മാസത്തിലേറെയായെങ്കിലും പുനർ നിർമ്മാണജോലികൾ തുടങ്ങാത്തതിനാൽ റോഡിൽ പൊടിശല്യം രൂക്ഷം.

വെള്ളപ്പൊക്കത്തെ അതിജീവിക്കും വിധംറോഡ് പുനർനിർമ്മിക്കാനുള്ള തീരുമാന പ്രകാരമാണ് ജോലികൾക്ക് തുടക്കം കുറിച്ചത്. പൊടിശ്യമൊഴിവാക്കാൻ കാലത്തും വൈകിട്ടുംറോഡിൽ വെള്ളമൊഴിക്കാൻ കരാറുകാരൻ തയ്യാറാകാത്തതാണ് ജനങ്ങൾക്ക് ദുരിതമുണ്ടാക്കുന്നത്.

കഴിഞ്ഞ പ്രളയത്തിൽ ഈ റോഡ് പൂർണ്ണമായും വെള്ളത്തിനടിയിലാകുകയും അന്നു രക്ഷാപ്രവർത്തനംപോലും വൻ വെല്ലുവിളിയായി മാറുകയും ചെയ്തിരുന്നു. ഈ സാഹചര്യത്തിലായിരുന്നു റോഡ് പൊക്കം കൂട്ടി നിർമ്മിക്കാനുള്ള തീരുമാനമെടുത്തത്.

റോഡു നിർമ്മാണത്തിന്റെ പേരിൽ കെ എസ് ആർ ടി സി ബസ് സർവ്വീസും നിറുത്തിയതിനാൽ യാത്രാക്ലേശം രൂക്ഷമാണ്. . നൂറ് കണക്കിന് വിദ്ധ്യാർത്ഥികളാണ് ഇതുമൂലം സ്‌ക്കൂളിലുംകോളേജിലും മ​റ്റും എത്തുന്നതിനായി ബുദ്ധിമുട്ടുന്നത്. നീരേ​റ്റുപുറത്തോ കിടങ്ങറ ജംഗ്ക്ഷനിലോ എത്തിയാലേ ഇവർക്ക് ബസ് കയറി പോകാൻ കഴിയൂ. ബസ് സർവ്വീസ് നിർത്തലാക്കുമ്പോൾ ഉണ്ടാകുന്ന യാത്രാക്ലേശം പരിഹരിക്കുന്നതിന് പുതുതായി കിടങ്ങറ- നീരേ​റ്റുപുറം ബോട്ട് സർവ്വീസ് ആരംഭിക്കുമെന്ന് പറഞ്ഞിരുന്നെങ്കിലും അതും നടപ്പായില്ല.