ന്യൂഡൽഹി: കേരളത്തിൽ ലവ് ജിഹാദ് റിപ്പോർട്ട് ചെയ്‌തിട്ടില്ലെന്ന് കേന്ദ്ര സർക്കാർ ലോക്‌സഭയിൽ അറിയിച്ചു. കേന്ദ്ര ഏജൻസികളൊന്നും ഇത്തരം കേസുകൾ റിപ്പോർട്ട് ചെയ്‌തിട്ടില്ലെന്നും കേരളത്തിൽ നിന്ന് മിശ്ര വിവാഹവുമായി ബന്ധപ്പെട്ട രണ്ട് കേസുകൾ ദേശീയ അന്വേഷണ ഏജൻസി അന്വേഷിച്ച് വരികയാണെന്നും ആഭ്യന്തര സഹമന്ത്രി കിഷൻ റെഡ്‌ഡി ലോക്‌സഭയിൽ ബെന്നി ബെഹ്‌നാൻ എം.പിയെ രേഖാമൂലം അറിയിച്ചു.
മതാചാരങ്ങൾ സംബന്ധിച്ച് ഭരണഘടനയുടെ 25-ാം വകുപ്പ് സ്വാതന്ത്ര്യം നൽകുന്നുണ്ടെന്നും എന്നാൽ ലവ് ജിഹാദിന് നിലവിലുള്ള നിയമങ്ങളിൽ നിർവചനമില്ലെന്നും മറുപടിയിൽ പറയുന്നു. കേരളത്തിൽ ലവ് ജിഹാദ് ഇല്ലെന്ന കേരള ഹൈക്കോടതിയുടെ കണ്ടെത്തൽ പരാമർശിച്ചു കൊണ്ടാണ് ബെന്നി ബെഹ്‌നാൻ ചോദ്യം ഉന്നയിച്ചത്. രണ്ടു വർഷത്തിനുള്ളിൽ കേന്ദ്ര ഏജൻസികൾ കേരളത്തിൽ ലവ് ജിഹാദുകൾ റിപ്പോർട്ട് ചെയ്‌തിട്ടുണ്ടോ എന്നും എം.പി ചോദിച്ചിരുന്നു.
12 ക്രൈസ്‌തവ യുവതികളെ ലവ് ജിഹാദിലൂടെ വിവാഹം ചെയ്‌ത് മതം മാറ്റിയെന്ന് സീറോ മലബാർ സഭ ആരോപിച്ചത് വിവാദമായിരുന്നു. വിവാഹം ചെയ്‌ത യുവതികളെ സിറിയയിലേക്ക് കൊണ്ടുപോയെന്നും കേരളത്തിൽ ഈ പ്രവണത വർദ്ധിച്ചുവരികയാണെന്നും സഭ ആരോപിച്ചിരുന്നു.