വൈപ്പിൻ : ഓട്ടോറിക്ഷയും ടാങ്കർ ലോറിയും കൂട്ടിയിടിച്ച് ഓട്ടോയിൽ സഞ്ചരിച്ച ഒരു കുടുംബത്തിലെ മൂന്ന് പേർക്ക് പരിക്കേറ്റു. ആലുവ സ്വദേശി സിജേഷ് ( 35) , ഭാര്യ രേഷ്മ (25) , മകൾഒരു വയസുള്ള ആർച്ച എന്നിവരെ എറണാകുളം മെഡിക്കൽ ട്രസ്റ്റ് ആശുപത്രിയിൽ പ്രവേശിപ്പിച്ചു.എടവനക്കാട് കുഴുപ്പിള്ളി തെക്കേക്കരബസ് സ്റ്റോപ്പി​ൽ കഴിഞ്ഞ രാത്രിയിലാണ് സംഭവം. മറ്റൊരു കുട്ടി പരിക്കേൽക്കാതെ രക്ഷപ്പെട്ടു..

കുഴുപ്പിള്ളി താണിയത്ത് ലൈനിന് കിഴക്ക് സഹോദരിയുടെ വീട്ടിൽ നടന്ന ചടങ്ങുകൾക്ക് ശേഷം ആലുവയിലേക്ക് സ്വന്തം ഓട്ടോയിൽ പോകുമ്പോഴാണ് സംഭവം.താണിയത്ത് ലൈനിൽ നിന്നും വൈപ്പിൻ മുനമ്പം സംസ്ഥാന പാതയിലേക്ക് കയറിയ ഓട്ടോയി​ൽ വടക്ക് നിന്നും വരികയായിരുന്ന ടാങ്കർ ലോറി ഇടിക്കുകയായിരുന്നു. നിയന്ത്രണം വിട്ട ടാങ്കർ സെയ്തു മുഹമ്മദ് റോഡിൽ ഇലക്ട്രിക് പോസ്റ്ററുകൾ തകർത്താണ് നിന്നത്.ഓട്ടോയിൽ നിന്ന് ഭാര്യയും രണ്ട് കുട്ടികളും തെറിച്ചു റോഡിൽ വീണു. ഞാറയ്ക്കൽ പൊലീസ് കേസെടുത്തു.