വാഴക്കുളം: ഭർത്താവിനൊപ്പം സ്കൂട്ടറിൽ സഞ്ചരിക്കുകയായിരുന്ന വീട്ടമ്മ വാഹനാപകടത്തിൽ മരിച്ചു. കദളിക്കാട് തെക്കുംമല കൂവേലിൽ വർഗീസിന്റെ (കുഞ്ഞ്) ഭാര്യ ചിന്നമ്മയാണ് (65) മരിച്ചത്. ഇന്നലെ രാവിലെ എട്ടരയോടെ വാഴക്കുളം ഫെഡറൽ ബാങ്കിനു സമീപമുള്ള വളവിലായിരുന്നു അപകടം. കദളിക്കാടു ഭാഗത്തുനിന്ന് വാഴക്കുളത്തേക്കു സ്‌കൂട്ടറിൽ വരികയായിരുന്നു വർഗീസും ചിന്നമ്മയും. ഒരേ ദിശയിൽ വരികയായിരുന്ന ടിപ്പർലോറിയെ മറികടന്നെത്തിയ കാർ ഇവരുടെ സ്‌കൂട്ടറിൽ ഇടിക്കുകയായിരുന്നു. ഇടിയേറ്റ് നിയന്ത്രണം വിട്ടുമറിഞ്ഞ സ്‌കൂട്ടറിൽ നിന്ന് തെറിച്ചുവീണ ചിന്നമ്മ പിന്നാലെ എത്തിയ ടിപ്പറിനടിയിൽപ്പെടുകയായിരുന്നു. ഓടിക്കൂടിയ നാട്ടുകാർ ചേർന്ന് ഉടനെ കോലഞ്ചേരി മെഡിക്കൽ കോളേജാശുപത്രിയിൽ പ്രവേശിപ്പിച്ചെങ്കിലും ചിന്നമ്മയുടെ ജീവൻ രക്ഷിക്കാനായില്ല. മൃതദേഹം മൂവാറ്റുപുഴ ജനറലാശുപത്രി മോർച്ചറിയിൽ. ഇന്നു രാവിലെ പോസ്റ്റുമോർട്ടത്തിനു ശേഷം ബന്ധുക്കൾക്കു വിട്ടുനൽകും. സംസ്കാരം വൈകിട്ട് 3 ന് വാഴക്കുളം സെന്റ് ജോർജ് ഫൊറോന പള്ളിയിൽ. വാഴക്കുളത്തെ ഹോട്ടലിൽ ജീവനക്കാരിയായിരുന്നു. വാഴക്കുളം കാവന കുന്നേൽ കുടുംബാംഗമാണ്. മക്കൾ: സുബി ( നിർമ്മല മെഡിക്കൽ സെന്റർ, മൂവാറ്റുപുഴ), ജോബി. മരുമകൻ: സിജു.