പറവൂർ : നഗരത്തിലെ തെരുവു കച്ചവടക്കാർക്കായി നിർമ്മിച്ച മുസിരിസ് ബസാറിന്റെ ഉദ്ഘാടനം നാളെ (ശനി) വൈകിട്ട് അഞ്ചിന് വി.ഡി. സതീശൻ എം.എൽ.എ നിർവ്വഹിക്കും. നഗരസഭ ചെയർമാൻ ഡി. രാജ്കുമാർ അദ്ധ്യക്ഷത വഹിക്കും. കുടുംബശ്രീ എക്സിക്യുട്ടീവ് ഡയറക്ടർ എസ്. ഹരികിഷോർ മുഖ്യാതിഥിയാകും.

തെരുവു കച്ചവടക്കാരുടെ ജീവിതസാഹചര്യം മെച്ചപ്പെടുത്തുന്നതിനും സുരക്ഷിതത്വം ഉറപ്പാക്കാനുമായി ദേശീയ നഗരഉപജീവനമിഷന്റെ സഹായത്തോടെ പറവൂർ നഗരസഭയിൽ കുടുംബശ്രീ സംസ്ഥാനമിഷന്റെ സഹകരണത്തോടെയാണ് ബസാർ നിർമ്മിച്ചത്. കേരളത്തിലെ ഇത്തരത്തിലുള്ള ആദ്യത്തെ തെരുവുകച്ചവട കേന്ദ്രമാണിത്. 36.50 ലക്ഷം രൂപയുടെ പദ്ധതിയുടെ ആദ്യഘട്ടമെന്ന നിലയിൽ 24 കച്ചവടക്കാരെയാണ് പുനരധിവസിപ്പിക്കുന്നത്. പറവൂർ സ്വകാര്യ ബസ് സ്റ്റാൻഡിനു പുറകുവശത്തുള്ള ബസാർ രാവിലെ മുതൽ രാത്രി വരെ പ്രവർത്തിക്കും. ബസാറിന്റെ നിർമ്മാണം മാസങ്ങൾക്ക് മുമ്പ് പൂർത്തിയായിരുന്നു.