പ്രൊഫ. ബി. പ്രകാശ്കുമാർ എം.ജി. രജിസ്ട്രാർ;
ഡോ. സി.എം. ശ്രീജിത്ത് പരീക്ഷ കൺട്രോളർ
കോട്ടയം: മഹാത്മാഗാന്ധി സർവകലാശാല രജിസ്ട്രാറായി പ്രൊഫ. ബി. പ്രകാശ്കുമാറിനെയും പരീക്ഷ കൺട്രോളറായി ഡോ. സി.എം. ശ്രീജിത്തിനെയും ഫിനാൻസ് ഓഫീസറായി ബിജു മാത്യുവിനെയും നിയമിച്ചു. ഡെപ്യൂട്ടേഷൻ വ്യവസ്ഥയിൽ നാലു വർഷത്തേക്കാണ് നിയമനം.
നിലവിൽ പരീക്ഷ കൺട്രോളറുടെ ചുമതല വഹിച്ചിരുന്ന പ്രൊഫ. ബി. പ്രകാശ് കുമാർ സ്‌കൂൾ ഒഫ് ബയോ സയൻസസിലെ പ്രൊഫസറാണ്. പാലാ സെന്റ് തോമസ് കോളേജിൽ ബയോകെമിസ്ട്രി വകുപ്പ് മേധാവിയും സർവകലാശാല സെനറ്റ് അംഗവുമായിരുന്നു. തിരുവനന്തപുരം മൺവിള സ്വദേശിയാണ്. ഭാര്യ: ഷീബ രവി (ജില്ലാ സൈനിക ക്ഷേമ ഓഫീസർ, കോട്ടയം) മകൻ: വേദാന്ത് (മുംബൈ ഐ.ഐ.ടി. വിദ്യാർത്ഥി).
പരീക്ഷ കൺട്രോളറായി നിയമിക്കപ്പെട്ട ഡോ. സി.എം. ശ്രീജിത് മാല്യങ്കര എസ്.എൻ.എം. കോളേജ് പ്രിൻസിപ്പലാണ്. എം.ജി.യിൽ ബോട്ടണി ബോർഡ് ഒഫ് സ്റ്റഡീസ് അംഗമായിരുന്നു. ചാലക്കുടി സ്വദേശിയാണ്. ഭാര്യ: സ്മിത എം. ചെല്ലപ്പൻ (സീനിയർ അക്കൗണ്ടന്റ്, കൊച്ചിൽ പോർട്ട്ട്രസ്റ്റ്), മക്കൾ: സിദ്ധാർഥ് മാധവ് (ആലുവ യു.സി. കോളജ് വിദ്യാർത്ഥി), ശ്രീ പാർവതി(വിദ്യാർത്ഥി).
കേരള ഇലക്ട്രിക്കൽ ആൻഡ് അലൈഡ് എൻജിനീയറിംഗ് കമ്പനി ലിമിറ്റഡിൽ ഫിനാൻസ് വിഭാഗം ജനറൽ മാനേജരാണ് ഫിനാൻസ് ഓഫീസറായി നിയമിതനായ ബിജു മാത്യൂ. ഇൻസ്റ്റിറ്റ്യൂട്ട് ഒഫ് കോസ്റ്റ് അക്കൗണ്ട്‌സ് ഒഫ് ഇന്ത്യയിൽ ഫെലോഷിപ്പ് മെമ്പറാണ്. മൂവാറ്റുപുഴ വാഴക്കുളം സ്വദേശിയാണ്. ഭാര്യ: ഡെൻസി ബിജു മകൻ: സബിൻ ബിജു (വിദ്യാർത്ഥി)
വൈസ് ചാൻസലർ, പ്രോ വൈസ് ചാൻസലർ, രജിസ്ട്രാർ തസ്തികകളിൽ ഒരേസമയം മഹാത്മാ ഗാന്ധി സർവകലാശാല കാമ്പസിലെ അദ്ധ്യാപകർ നിയോഗിക്കപ്പെടുന്നത് ഇതാദ്യമാണ്.
പരീക്ഷ തീയതി
ഒന്നാം സെമസ്റ്റർ എം.എസ്‌സി. ഫിഷറി ബയോളജി ആന്റ് അക്വാകൾച്ചർ (2019 അഡ്മിഷൻ റഗുലർ) പരീക്ഷകൾ 20 ന് ആരംഭിക്കും. പിഴയില്ലാതെ 17 വരെയും 525 രൂപ പിഴയോടെ 18 വരെയും 1050 രൂപ സൂപ്പർഫൈനോടെ 19 വരെയും അപേക്ഷിക്കാം.
ഒന്നാം സെമസ്റ്റർ എം.എഡ്. (സ്‌പെഷൽ എജ്യൂക്കേഷൻ ഇന്റലക്ച്വൽ ഡിസെബിലിറ്റി ദ്വിവത്സരം 2019 അഡ്മിഷൻ റഗുലർ) പരീക്ഷകൾ മാർച്ച് മൂന്നുമുതൽ നടക്കും. പിഴയില്ലാതെ 18 വരെയും 525 രൂപ പിഴയോടെ 19 വരെയും 1050 രൂപ സൂപ്പർഫൈനോടെ 20 വരെയും അപേക്ഷിക്കാം. റഗുലർ വിദ്യാർഥികൾ 210 രൂപ സി.വി. ക്യാമ്പ് ഫീസായി പരീക്ഷഫീസിന് പുറമെ അടയ്ക്കണം.
പുതുക്കിയ പരീക്ഷ തീയതി
2019 നവംബർ 12ന് നടത്താനിരുന്ന ഒന്നാം സെമസ്റ്റർ എം.എച്ച്.എം. ആന്റ് എം.ടി.ടി.എം. (2019 അഡ്മിഷൻ റഗുലർ) പരീക്ഷകൾ 20 മുതൽ നടക്കും.
അപേക്ഷ തീയതി
അഞ്ചാം സെമസ്റ്റർ സി.ബി.സി.എസ്.എസ്. സൈബർ ഫോറൻസിക് യു.ജി. പരീക്ഷയിൽ പരാജയപ്പെട്ട വിദ്യാർത്ഥികൾക്ക് പിഴയില്ലാതെ 18മുതൽ 22 വരെയും 525 രൂപ പിഴയോടെ 24 വരെയും 1050 രൂപ സൂപ്പർഫൈനോടെ 25 വരെയും സർവകലാശാല പോർട്ടലിലൂടെ അപേക്ഷിക്കാം. വിദ്യാർത്ഥികൾ പേപ്പറൊന്നിന് 35 രൂപ വീതം (സെമസ്റ്ററിന് പരമാവധി 210 രൂപ) സി.വി. ക്യാമ്പ് ഫീസടയ്ക്കണം. കൂടാതെ രജിസ്‌ട്രേഷൻ ഫീസായി 55 രൂപയും പരീക്ഷഫീസിന് പുറമെ അടയ്ക്കണം. ഇന്റേണൽ മൂല്യനിർണയ റീഡു പരീക്ഷയ്ക്ക് അപേക്ഷിക്കുന്നവർ പേപ്പറൊന്നിന് 105 രൂപ വീതം അടയ്ക്കണം. പ്രൊജക്ട് മൂല്യനിർണയത്തിന് 80 രൂപ പ്രൊജക്ട് ഇവാല്യവേഷൻ ഫീസടയ്ക്കണം. പരീക്ഷ തീയതി പിന്നീട്.
പ്രാക്ടിക്കൽ
ഒന്നാം സെമസ്റ്റർ ബി.എസ്‌സി. സൈബർ ഫോറൻസിക് (സി.ബി.സി.എസ്. റഗുലർ) പരീക്ഷയുടെ പ്രാക്ടിക്കൽ 19 മുതൽ 25 വരെ അതത് കോളേജുകളിൽ നടക്കും.
മൂന്നാം സെമസ്റ്റർ എം.പി.എഡ്. (2018 അഡ്മിഷൻ റഗുലർ/2015 അഡ്മിഷൻ മുതൽ സപ്ലിമെന്ററി) പരീക്ഷയുടെ പ്രാക്ടിക്കൽ 25ന് മൂലമറ്റം സെന്റ് ജോസഫ്‌സ് അക്കാഡമി ഒഫ് ഹയർ എജ്യൂക്കേഷൻ ആന്റ് റിസർച്ചിൽ നടക്കും.
ബി.ടെക് പുനർമൂല്യനിർണയം
സിൻഡിക്കേറ്റ് മോഡറേഷൻ റദ്ദാക്കപ്പെട്ടതുമൂലം ബി.ടെക് ഡിഗ്രി കോഴ്‌സിൽ പരാജയപ്പെട്ട വിദ്യാർത്ഥികൾക്ക് 2018 ഡിസംബറിൽ നടന്ന ഒന്നുമുതൽ എട്ടുവരെ സെമസ്റ്റർ സപ്ലിമെന്ററി പരീക്ഷകളുടെ പുനർമൂല്യനിർണയത്തിന് 20 വരെ അപേക്ഷിക്കാം. 2019 ഡിസംബർ 13ലെ വിജ്ഞാപനപ്രകാരം അപേക്ഷിച്ചവർ വീണ്ടും അപേക്ഷിക്കേണ്ടതില്ല.