മാവേലിക്കര: അച്ചൻകോവിലാറ്റിൽ കുളിക്കാനിറങ്ങിയ ഹൈക്കോടതി അഭിഭാഷകൻ, തൃപ്പൂണിത്തറ കരിങ്ങാച്ചിറ ഗായത്രിയിൽ രാജ്കുമാർ (50) മുങ്ങിമരിച്ചു. കുടുംബവീടായ തഴക്കര ഇളമ്പാശേരിൽ വീട്ടിൽ സമുദായത്തിന്റെ യോഗത്തിൽ പങ്കെടുക്കാനെത്തിയതായിരുന്നു ഇദ്ദേഹം. ഇന്നലെ വൈകിട്ട് അഞ്ചോടെയായിരുന്നു സംഭവം.

അയൽവാസിയും ഓട്ടോഡ്രൈവറുമായ മധുവിനൊപ്പം വഴുവാടി കടവിലാണ് കുളിക്കാനെത്തിയത്. ആറ്റിലേക്ക് ചാടിയപ്പോൾ ചെളിയിൽ പുതഞ്ഞുപോയതാണ് അപകടത്തിന് കാരണമെന്ന് കരുതുന്നു. ഫയർഫോഴ്‌സും നാട്ടുകാരും ചേർന്ന് നടത്തിയ തെരച്ചിലിനൊടുവിൽ വൈകിട്ട് 6.30 ഓടെ കുളിക്കടവിനു സമീപത്തു നിന്നുതന്നെ മൃതദേഹം കണ്ടെത്തുകയായിരുന്നു. മൃതദേഹം മാവേലിക്കര ജില്ലാ ആശുപത്രി മോർച്ചറിയിൽ.

തഴക്കര ഇളമ്പാശേരിൽ വീട്ടിൽ പരേതരായ പി.ടി. സദാശിവൻപിള്ള- തങ്കമണിയമ്മാൾ ദമ്പതികളുടെ മകനാണ്. ഭാര്യ: ഷീന (ആരോഗ്യ വകുപ്പ്). മകൾ: ഗായത്രി (എം.ബി.ബി.എസ് വിദ്യാർത്ഥിനി, ഉക്രൈൻ). സംസ്‌കാരം പിന്നീട്.