കൊച്ചി​: നാലു വർഷം മുൻപ് തുടങ്ങിയ ഫ്രൂട്ട്ഫുൾ ഫ്യൂച്ചർ ഒരു സംഘടനയല്ല. നാടൻ ഫലവൃഷങ്ങളുടെ വിത്ത് ശേഖരി​ച്ച് വളർത്തുക ലക്ഷ്യമുള്ള ശ്രമം മാത്രം.

വൈപ്പിൻ എടവനക്കാട് സ്വദേശിയായ മനോജ് കുമാർ ഐ.ബി എന്ന ഇലക്ട്രിക്കൽ എൻജിനീയറുടെ ജീവി​ത ദൗത്യം എന്നും പറയാം. ആവശ്യക്കാർക്ക് വി​വി​ധ ഫലവൃക്ഷങ്ങൾ ശാസ്ത്രീയമായി​ നട്ടുനൽകിയും​ വളർത്തിയും കൊടുക്കും മനോജ്. ഫലവൃക്ഷസമൃദ്ധമായ നാടാണ് സ്വപ്നം.

ഒന്നരവർഷമായി ജോലി ഉപേക്ഷിച്ച് മണ്ണിനെ അറിയാൻ മനോജ് ഇറങ്ങിയിട്ട്. ഒന്നര ഏക്കർ വീട്ടുവളപ്പ് മരങ്ങളാലും ചെറുചെടികളാലും സസ്യങ്ങളാലും നിറഞ്ഞു. വീട്ടുമുറ്റത്ത് പൊഴിയുന്ന ഇലപോലും എടുത്തുമാറ്റാറി​ല്ല.

സ്വന്തമായി വൃക്ഷത്തൈകളുടെ നഴ്സറി നമ്മുടെ വീട്ടിലൊരുക്കാം എന്ന ഏകദിന പരിശീലനം കുട്ടികൾക്കായി ശനി, ഞായർ ദിവസങ്ങളിൽ നടത്തിവരുന്നുണ്ട്.

പല ഇടങ്ങളിൽ നിന്നായി ശേഖരിക്കുന്ന വിത്തിനങ്ങൾ മനോജ് വീട്ടിൽ കൊണ്ട് വന്ന് മുളപ്പിച്ച് ആവശ്യക്കാർക്ക് വെറുതെ നൽകുകയാണ്. ഇവരി​ൽ കുട്ടികൾ മുതൽ ടെക്കികൾ വരെയുണ്ട്. 61 സെന്റി​ൽ അടുത്ത ജൂണോടെ ചെറു വനമൊരുക്കാനുള്ള തയ്യാറെടുപ്പിലാണ് മനോജ്. വലി​ച്ചെറി​യുന്ന വി​ത്തുകൾ ശേഖരി​ച്ച് നൽകാൻ തയ്യാറുണ്ടോ.... വൃക്ഷങ്ങൾ നടുവാൻ ഒരുക്കമാണോ... ഇതാണ് മനോജി​ന്റെ നമ്പർ: 9847446918

കൃഷി പഠിക്കാൻ നാടൻ കൃഷിക്കാരെയും ആദിവാസികളെയും കാണുകയാണ് വേണ്ടത്. കുട്ടികൾ പ്രകൃതിയെ പഠിക്കേണ്ടത് ക്ലാസ് മുറികളിൽ നിന്നല്ല. മണ്ണിനെ അറിയണമെങ്കിൽ മണ്ണിലിറങ്ങണം. നമ്മുക്ക് കഴിയുന്ന തരത്തിലുള്ള ചെടികൾ വച്ച് പിടിപ്പിക്കുക.പ്രകൃതിയെ സംരക്ഷിക്കുക.

മനോജ് കുമാർ ഐ.ബി