ആലുവ: മഹാശിവരാത്രി മഹോത്സവത്തിന്റെ ഭാഗമായി നഗരത്തിലും പരിസര പ്രദേശങ്ങളിലും വിപുലമായ സുരക്ഷാ ക്രമീകരണങ്ങൾ ഏർപ്പെടുത്തിയതായി ജില്ലാ പൊലീസ് മേധാവി കെ. കാർത്തിക് അറിയിച്ചു.

ജില്ലാ പൊലീസ് മേധാവിയുടെ മേൽനോട്ടത്തിൽ 10 ഡിവൈ.എസ്.പി, 30 സി.ഐ, 164 എസ്.ഐ/എ.എസ്.ഐ, 1500 എസ്.സി.പി.ഒ /സി.പി.ഒമാർ, 200 വനിത സി.പി.ഒമാർ എന്നിവരടങ്ങുന്ന വിപുലമായ പൊലീസ് സംഘമുണ്ടാകും. പോക്കടിക്കാരെയും പിടിച്ചുപറിക്കാരെയും മറ്റും നിരീക്ഷിക്കുന്നതിനായി മഫ്തി പൊലീസ് സ്‌ക്വാഡ് രൂപീകരിച്ചിട്ടുണ്ട്. 100 നിരീക്ഷണ കാമറകൾ സ്ഥാപിച്ചിട്ടുണ്ട്. ഇരുപത്തിനാല് മണിക്കൂറും പ്രവർത്തിക്കുന്ന പൊലീസ് കൺട്രോൾ റൂം മണപ്പുറത്ത് നാളെ മുതൽ പ്രവൽത്തനമാരംഭിക്കും. ആത്യാവശ്യഘട്ടങ്ങളിൽ രോഗികളെ പരിചരിക്കുന്നതിനുള്ള സൗകര്യങ്ങളും ആംബുലൻസ് സർവീസും ഉണ്ടാകും.

നാളെ വൈകിട്ട് നാലുമുതൽ മറ്റന്നാൾ ഉച്ചവരെ

നഗരത്തിൽ ഗതാഗത നിയന്ത്രണം.

# അങ്കമാലി ഭാഗത്ത് നിന്ന് മണപ്പുറത്തേയ്ക്ക് വരുന്ന വാഹനങ്ങൾ സെമിനാരിപ്പടിയിൽ നിന്ന് ജി.സി.ഡി.എ റോഡുവഴി പോകണം. # മണപ്പുറത്ത് കെ.എസ്.ആർ.ടി.സി ബസുകൾക്കും സ്വകാര്യ വാഹനങ്ങൾക്കും പ്രത്യേകം പാർക്കിംഗ് സൗകര്യമുണ്ട്.
# മണപ്പുറം ഭാഗത്ത് നിന്നുള്ളള്ള ബസ് ഉൾപ്പെടെയുള്ള വാഹനങ്ങൾ ഓൾഡ് ദേശം റോഡ് വഴി പറവൂർ കവലയിലെത്തണം. # തോട്ടയ്ക്കാട്ടുക്കരയിൽ നിന്ന് മണപ്പുറത്തേയ്ക്ക് വാഹനഗതാഗതം അനുവദിക്കില്ല.

# വരാപ്പുഴ ഭാഗങ്ങളിൽ നിന്നുവരുന്ന ബസുകൾ തേട്ടയ്ക്കാട്ടുക്കര കവലയിൽനിന്ന് ഇടത്തോട്ട് തിരിഞ്ഞ് യാത്രക്കാരെ ഇറക്കിയതിനുശേഷം പറവൂർ കവല, യു.സി കോളേജ്, കടുങ്ങല്ലൂർ വഴി തിരികെ പോകണം.

# അങ്കമാലി ഭാഗത്ത് നിന്നുവരുന്ന സ്വകാര്യ ബസുകൾ പറവൂർ കവലയ്ക്ക് സമീപം ടെസ്റ്റ് ഗ്രൗണ്ടിൽ യാത്ര അവസാനിപ്പിച്ച് വന്നവഴി മടങ്ങണം.

# എറണാകുളത്ത് നിന്നുള്ള സ്വകാര്യ ബസുകൾ പുളിഞ്ചോട് ജംഗ്ഷനിൽ നിന്ന് കാരോത്തുകുഴി ജംഗ്ഷൻ വഴി സ്റ്റാൻഡിലെത്തണം. തിരികെ എറണാകുളത്തേക്കുള്ള സ്വകാര്യ ബസുകൾ ബാങ്ക് കവല ബൈപാസ് വഴി മടങ്ങണം.
# കെ.എസ്.ആർ.ടി.സി ബസുകൾ പുളിഞ്ചോട് നിന്ന് സർവീസ് റോഡുവഴി സീമാസിനു മുൻവശം യാത്രക്കാരെ ഇറക്കിയശേഷം അണ്ടർ പാസ് വഴി വലത്തേക്കുതിരിഞ്ഞ് സർവീസ് റോഡിലൂടെ പുളിഞ്ചോട്, കാരോത്തുകുഴി കവല വഴി കെ.എസ്.ആർ.ടി.സി സ്റ്റാൻഡിലെത്തണം.

# തിരികെ എറണാകുളത്തേക്കുള്ള ബസുകൾ കാരോത്തുകുഴി, സ്വകാര്യ സ്റ്റാൻഡ്, ബാങ്ക് കവല ബൈപാസ് വഴി മടങ്ങണം.
# പെരുമ്പാവൂരിൽ നിന്നുവരുന്ന കെ.എസ്.ആർ.ടി.സി ബസുകൾ, പമ്പ് ജംഗ്ഷൻ വഴി ടൗൺ ഹാളിന് മുൻവശം താത്കാലിക സ്റ്റാൻഡിൽ യാത്ര അവസാനിപ്പിക്കണം. തിരികെ അതേവഴി മടങ്ങണം.

# പെരുമ്പാവൂരിലേക്ക് പോകുന്ന സ്വകാര്യ ബസുകൾ സ്റ്റാൻഡിൽ നിന്ന് ബാങ്കുകവല, ബൈപാസ് സർവീസ് റോഡ്, പുളിഞ്ചോട്, കാരോത്തുകുഴി, ആശുപത്രി, പവർഹൗസ് വഴി പോകണം.

# ബാങ്കുകവല മുതൽ ടൗൺഹാൾ റോഡ് വരെ സ്വകാര്യ വാഹനങ്ങൾ ഉൾപ്പെടെ യാതൊരുവിധ വാഹന ഗതാഗതവും അനുവദിക്കില്ല.

# ഹൈവേകളിലും നഗരത്തിലും റോഡ് സൈഡിൽ വാഹന പാർക്കിംഗ് അനുവദിക്കില്ല.

#നാളെ രാത്രി 10 മുതൽ 22ന് രാവിലെ 10 വരെ തൃശുർ ഭാഗത്തുനിന്നും വരുന്ന ചരക്ക് വാഹനങ്ങൾ അങ്കമാലിയിൽ നിന്ന് എം.സി റോഡിലൂടെ പോകണം.

# എറണാകുളത്തു നിന്നുവരുന്ന ചരക്ക് വാഹനങ്ങൾ കളമശേരിയിൽ നിന്ന് കണ്ടെയ്‌നർ റോഡ് വഴി പറവൂർ, മാഞ്ഞാലി റോഡ് അത്താണിയിൽ പ്രവേശിക്കണം.

മറ്റ് സുരക്ഷാ ക്രമീകരണങ്ങൾ

മണപ്പുറത്തുള്ള അമ്പലത്തിൽ നിന്നും 50 മീറ്റർ ചുറ്റളവിൽ വഴിയോരക്കച്ചവടം അനുവദിക്കില്ല. നഗരസഭ യാചക നിരോധന മേഖലയായി പ്രഖ്യാപിച്ചതിനാൽ ഭിക്ഷാടനം അനുവദിക്കില്ല. പെരിയാറിൽ പൊലീസിന്റെ നേതൃത്വത്തിൽ ലൈഫ് ബാഗ് ഉൾപ്പെടെയുള്ള സജ്ജീകരണങ്ങളോടെ പട്രോളിംഗ് നടത്തും.
ഗുണ്ടകളെ നിരീക്ഷിക്കുന്നതിനായി സ്‌പെഷ്യൽസ്‌ക്വാഡ് രൂപീകരിച്ചിട്ടുണ്ട്. റെയിൽവെ സ്റ്റേഷനിൽ പ്രത്യേകം പൊലീസിനെ നിയോഗിക്കും. നഗരത്തിലും പരിസരത്തും നാളെയും മറ്റെന്നാളും മദ്യവില്പനയും, ഉപഭോഗവും നിരോധിച്ചിട്ടുണ്ട്.