കളമശേരി : ലൈഫ് പദ്ധതി​യി​ൽ ഭവനരഹിതർക്ക് വീട് പണിയാനായി കോടികൾ ചിലവഴിച്ച് കളമശേരി നഗരസഭ വാങ്ങുന്ന രണ്ടേക്കറിൽ പകുതിയും പാഴ്ഭൂമി.

മറ്റക്കാട് കുറൂപ്ര മലയിൽ രണ്ടു വശങ്ങളിൽ മണ്ണെടുത്ത ഭൂമിയാണിത്. നിരപ്പുള്ളിടം മഴക്കാലത്ത് ചതുപ്പുമാകും. ചരിവ് ക്രമപ്പെടുത്തുമ്പോഴാണ് പകുതിയോളം ഭൂമി നിർമ്മാണത്തിന് യോജിക്കാതെ വരിക.

വിലക്കുറവിന്റെ പേരിൽ ഈ ഭൂമി തന്നെ വാങ്ങണമെന്ന നിലപാടിലാണ് ഭരണസമിതി. ഏതാനും അംഗങ്ങളുടെ ലാഭക്കൊതി​യാണ് ഈ താല്പര്യത്തി​ന് പി​ന്നി​ലെന്നാണ് സൂചന. ലൈഫ് പദ്ധതിയായതിനാൽ വില നിർണ്ണയത്തിനും അനുമതിക്കുമായി ഫയൽ ഇപ്പോൾ കളക്ടറുടെ മേശപ്പുറത്താണ്.

രണ്ടേക്കറിന് രണ്ടു കോടി കമ്മീഷനോ?

ഈ ഭൂമി കച്ചവടത്തിൽ ഭരണ സമിതിയിലെ പ്രമുഖർക്ക് ലഭിക്കുന്നത് രണ്ട് കോടി കമ്മീഷനാണെന്നും ആരോപണമുയർന്നിട്ടുണ്ട്. സെന്റിന് ഒന്നര ലക്ഷത്തിന് പോലും വാങ്ങാനാളില്ലാതിരുന്ന ഭൂമിയാണ് നഗരസഭ 2.60 ലക്ഷം രൂപയ്ക്ക് വാങ്ങുന്നതെന്നാണ് ആരോപണം. അൻപത് അടി താഴ്ചയി​ൽ ഖനനം നടത്തിയ ഭൂമിയാണിത്. കെ.എസ്. ഇ.ബിയുടെ ടവർ ലൈനും കടന്ന് പോകുന്നുണ്ട്.

പത്രപരസ്യം വഴിയാണ് നഗരസഭ ഈ രണ്ടേക്കർ ഭൂമി കണ്ടെത്തിയത്. രണ്ട് ഭൂവുടമകൾ കൂടി ടെണ്ടർ നൽകിയിരുന്നു.

മറ്റൊരു കവളപ്പാറയാകുമോ?

മണ്ണെടുത്ത് അമ്പത് അടിയോളം ഉയരവ്യത്യാസമുള്ള ഭൂമിയിലേക്ക് മണ്ണിടിച്ചിലിനും സാധ്യതയുണ്ട്. 1995ൽ മണ്ണെടുക്കവേ മലയിടിഞ്ഞ് ആറ് പേർ മരി​ച്ചയി​ടം കൂടി​യാണ് ഈ ഭൂമി​.

ചിത്രം:

നഗരസഭ ലൈഫ് പദ്ധതിയ്ക്ക് വാങ്ങുന്ന മറ്റക്കാട് കുറൂപ്ര മലയിൽ രണ്ടേക്കർ ഭൂമിയുടെ സാറ്റലൈറ്റ് ചിത്രം