മൂന്നാർ (ഇടുക്കി): പുതുതായി സർവീസിലെത്തിയ വില്ലേജ് എക്സ്‌റ്റൻഷൻ ഓഫീസർമാരുടെ (വി.ഇ.ഒ) ഇൻ സർവീസ് പരിശീലനത്തിന്റെ ഭാഗമായി കൊട്ടാരക്കര കില ഇ.ടി.സിയുടെ നേതൃത്വത്തിൽ ഇടമലക്കുടിയിലും കുറത്തിക്കുടിയിലും ഗോത്രായനം നടത്തി. പട്ടിക ഗോത്രവർഗ സങ്കേതങ്ങളിലെ പഠന പരിശീലനമായ ഗോത്രായനത്തിന് അതിദുർഘട പാതയിലൂടെയാണ് വി.ഇ.ഒ.മാരുടെ സംഘമെത്തിയത്. ഇതാദ്യമായാണ് വി.ഇ.ഒമാരുടെ പരിശീലനം ഈ മേഖലയിൽ നടത്തുന്നത്. മൂന്നാർ- രാജമല വഴി റിസർവ് വനമേഖല സ്ഥിതി ചെയ്യുന്ന ഇരവികുളം നാഷണൽ പാർക്കിനകത്ത് കൂടി 16 കിലോമീറ്ററോളം അതിദുർഘട പാതയിലൂടെ യാത്ര ചെയ്താണ് സംഘം ഇടമലക്കുടിയിലെത്തിയത്. രണ്ടര മൂന്നു മീറ്ററോളം മാത്രമുള്ള ഇടുങ്ങിയതും അതിദുർഘടവും വന്യമൃഗഭീതിയുള്ളതുമായ കാട്ടുപാതയിലൂടെയാണ് 21 വനിതകൾ ഉൾപ്പെട്ട 42 അംഗ വി.ഇ.ഒ.മാരുടെ സംഘം ഇടമലക്കുടിയിലെത്തിയത്. ആദിവാസി ഗോത്രജനവിഭാഗങ്ങളുടെ ജീവിതാവസ്ഥകൾ, സംസ്‌ക്കാരം എന്നിവ നേരിട്ടു മനസിലാക്കുക, ഉൾവനങ്ങളിൽ അതീവ ദുർഘട മേഖലയിൽ താമസിക്കുന്ന ഇവരുടെ വികസന പ്രശ്നങ്ങൾ നേരിട്ടറിയാനുമാണ് സങ്കേത പഠനം. സങ്കേതങ്ങളിലെ വീടുകളിലും പൊതു സ്ഥാപനങ്ങളിലുമാണ് പ്രധാനമായും സംഘം സന്ദർശിച്ചത്. കൂടാതെ, മറയൂർ പഞ്ചായത്തിലെ ആദിവാസികുടികളിലും സംഘം സന്ദർശിച്ചു പഠനം നടത്തി.