ഇടുക്കി : നാളികേര വികസന ബോർഡിന്റു കേര സുരക്ഷ ഇൻഷൂറൻസ് പദ്ധതി പ്രകാരം തെങ്ങുകയറ്റക്കാർക്ക് ഇൻഷൂറൻസ് പരിരക്ഷ ഉറപ്പാക്കാം. കേര സുരക്ഷ ഇൻഷുറൻസ് പദ്ധതിയിൻ കീഴിൽ അപേക്ഷിക്കുന്ന തെങ്ങുകയറ്റ തൊഴിലാളികൾക്ക് രണ്ടുലക്ഷം രൂപയുടെ ഇൻഷുറൻസ് പരിരക്ഷയാണ് നൽകുന്നത്. ഓറിയന്റൽ ഇൻഷൂറൻസ് കമ്പനിയുമായി സഹകരിച്ചാണ് പദ്ധതി നടപ്പിലാക്കുന്നത്. നാളികേര വികസന ബോർഡിന്റെ ചങ്ങാതിക്കൂട്ടം പരിശീലനമോ നീര ടെക്നീഷ്യൻ പരിശീലനമോ വിജയകരമായി പൂർത്തിയാക്കിയവർക്ക് ആദ്യവർഷം ഇൻഷുറൻസ് സൗജന്യമാണ്. അവരുടെ ഒരു വർഷത്തേക്കുള്ള പ്രീമിയം തുക മുഴുവൻ ബോർഡ് തന്നെ വഹിക്കും. ഇൻഷുറൻസ് കാലാവധി ഒരു വർഷമാണ്. കാലാവധിക്കു ശേഷം ഗുണഭോക്താവിന്റെ വിഹിതമായ 28 രൂപ നൽകി പോളിസി പുതുക്കാവുന്നതാണ്. പരമ്പരാഗതമായി തെങ്ങുകയറ്റം തൊഴിലായി ചെയ്യുന്ന അറുപത്തിയഞ്ച് വയസ്സിൽ താഴെയുള്ള തെങ്ങുകയറ്റ തൊഴിലാളികൾക്കും 28 രൂപ മുടക്കി പദ്ധതിയിൽ ഗുണഭോക്താവാകാം. നാളികേര വികസന ബോർഡിന്റെ പേരിൽ എറണാകുളത്ത് മാറാവുന്ന 28 രൂപയുടെ ഡിമാന്റ് ഡ്രാഫ്റ്റ് സഹിതം അപേക്ഷകൾ ചെയർമാൻ, നാളികേര വികസന ബോർഡ്, കേരഭവൻ, എസ്.ആർ.വി റോഡ്, കൊച്ചി - 682011 എന്ന വിലാസത്തിൽ അയയ്ക്കണം. ഫോൺ- 0484 2377266