ഇടുക്കി : സംസ്ഥാന മൃഗസംരക്ഷണവകുപ്പിന്റെ കീഴിൽ പ്രവർത്തിക്കുന്ന വാഗമൺ പരിശീലന കേന്ദ്രത്തിന്റെ നേതൃത്വത്തിൽ കർഷകർക്കായി ശാസ്ത്രീയ പശുപരിപാലത്തിൽ പരിശീലനം നൽകി. തൊടുപുഴ പി.ഡബ്ല്യു.ഡി. റസ്റ്റ് ഹൗസിൽ നടത്തിയ പരിശീലനത്തിൽ 45 ക്ഷീര കർഷകർ പങ്കെടുത്തു. വിവിധ വിഷയങ്ങളിലായി ഈ മാസം നടത്തുന്ന അഞ്ചാമത്തെ പരിശീലനമാണ് തൊടുപുഴയിലേതെന്ന് മൃഗസംരക്ഷണ വകുപ്പ് അസി.ഡയറക്ടർ ഡോ. ബിജു ചെമ്പരത്തി പറഞ്ഞു. സൗജന്യ പരിശീലന പരിപാടിയിൽ പങ്കെടുത്തവർക്ക് അംഗീകൃത സാക്ഷ്യപത്രവും ശാസ്ത്രീയ പശുപരിപാലനത്തെക്കുറിച്ചുള്ള ലഘുലേഖകളും നൽകും. മൃഗ സംരക്ഷണ വകുപ്പ് അസി. ഡയറക്ടർ ഡോ. സി. ഷൈൻകുമാർ ക്ലാസ് നയിച്ചു. പരിശീലനം ആവശ്യമുള്ള കർഷകരും സംഘങ്ങളും 9446131618, 9744276759 എന്ന നമ്പരുകളിൽ ബന്ധപ്പെടണമെന്ന് അധികൃതർ അറിയിച്ചു.