കട്ടപ്പന: നിർമ്മാണ തൊഴിലാളികളുടെ ക്ഷേമം ഉറപ്പുവരുത്താൻ സർക്കാർ അടിയന്തര നടപടി സ്വീകരിക്കണമെന്ന് കെ.പി.സി.സി ജനറൽ സെക്രട്ടറി അഡ്വ. ടോമി കല്ലാനി ആവശ്യപ്പെട്ടു. കേരള ബിൽഡിംഗ് ആന്റ് റോഡ് വർക്കേഴ്‌സ് ഫെഡറേഷൻ സംസ്ഥാന ജാഥയ്ക്ക് കട്ടപ്പനയിൽ നൽകിയ സ്വീകരണസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. പിരിഞ്ഞുകിട്ടാനുള്ള സെസ് എത്രയും വേഗം പിരിച്ചെടുത്ത് തൊഴിലാളികളുടെ പെൻഷൻ തുക വർദ്ധിപ്പിക്കണം. ഇപ്പോൾ ലഭിച്ചുകൊണ്ടിരിക്കുന്ന 1200 രൂപ എന്നുള്ളത് 5,000 രൂപയെങ്കിലുമായി വർദ്ധിപ്പിക്കണം. ജോണി ചീരാംകുന്നേൽ അദ്ധ്യക്ഷത വഹിച്ചു. സംസ്ഥാന പ്രസിഡന്റ് പി.എം. മുഹമ്മദ് ഹനീഫ, നേതാക്കളായ വി.സി. ആന്റണി ബാബു, എ.പി. ഉസ്മാൻ, ജോൺ പഴേരി, എ.എക്‌സ്. സേവ്യർ എന്നിവർ പ്രസംഗിച്ചു.