കാഞ്ഞങ്ങാട്: പൗരത്വ ബില്ലിനെതിരായ സമരം ഇടവേളകളില്ലാതെ മുന്നോട്ടു കൊണ്ടുപോകാൻ ഗാന്ധിജിയുടെ ഓർമ്മകൾ നമുക്ക് പ്രചോദനമാകണമെന്ന് ഡോ. ഖദീജ മുംതാസ് പറഞ്ഞു. പുരോഗമന കലാ സാഹിത്യ സംഘം കാസർകോട് ജില്ലാ കമ്മിറ്റി കാഞ്ഞങ്ങാട് പി. സ്മാരക മന്ദിരത്തിൽ സംഘടിപ്പിച്ച ഗാന്ധി സ്മൃതിസദസ് ഉദ്ഘാടനം ചെയ്യുകയായിരുന്നു അവർ.

നിയമപരമോ ഉപരിപ്ലവമോ ആയ ഒന്നായിരുന്നില്ല ഗാന്ധിജിക്ക് മതനിരപേക്ഷത. ആത്മാവു കൊണ്ട് മറ്റുള്ളവരെ അറിയുകയും അംഗീകരിക്കുകയും ചെയ്യുന്ന വിശാലമായ സാഹോദര്യബോധവും നീതിയുമായിരുന്നു. ഇതാണ് ഇന്ന് അട്ടിമറിക്കപ്പെടുന്നത്. സി.എം. വിനയചന്ദ്രൻ അധ്യക്ഷത വഹിച്ചു. വാസു ചോറോട്, അഡ്വ. പി. അപ്പുക്കുട്ടൻ, പ്രസംഗിച്ചു. ജയചന്ദ്രൻ കുട്ടമത്ത് സ്വാഗതവും കെ.എം. സുധാകരൻ നന്ദിയും പറഞ്ഞു.