ഇരിട്ടി : വീരാജ്‌പേട്ടയിൽ നിന്ന് കാറിൽ കടത്തുകയായിരുന്ന നാടൻ തോക്കിൽ ഉപയോഗിക്കുന്ന 60 തിരകളുമായി തില്ലങ്കേരി സ്വദേശി പിടിയിലായി. മച്ചൂർ മലയിലെ കെ. പ്രമോദി (42) നെയാണ് കിളിയന്തറ എക്സൈസ് ഇൻസ്‌പെക്ടർ ബി. വിഷ്ണുവിന്റെ നേതൃത്വത്തിലുള്ള എക്സൈസ് സംഘം പിടികൂടിയത്.
ഇന്നലെ ഉച്ചയ്‌ക്ക് മൂന്നു മണിയോടെ എക്സൈസ് സംഘം നടത്തിയ വാഹന പരിശോധനയ്ക്കിടെയാണ് ആൾട്ടോ കാറിൽ കടത്തുകയായിരുന്ന തിരകൾ കണ്ടെത്തിയത്. കാറിന്റെ ഡിക്കിക്കടിയിൽ ഒളിപ്പിച്ചുവച്ച നിലയിലായിരുന്നു തിരകൾ. ഒരു പെട്ടിയിൽ പത്തെണ്ണമെന്ന നിലയിലാണ് സൂക്ഷിച്ചത്.
കൃഷി നശിപ്പിക്കുന്ന പന്നികളെയും കുരങ്ങുകളെയും തുരത്തുന്നതിനുവേണ്ടിയാണ് ഇവ കൊണ്ടുവന്നതെന്ന് പ്രതി പറഞ്ഞതായി എക്സൈസ് ഇൻസ്‌പെക്ടർ അറിയിച്ചു. പ്രതിയെയും തിരകളും കാറും ഇരിട്ടി പൊലീസിന് കൈമാറി.
പ്രിവന്റീവ് ഓഫീസർമാരായ കെ. മുഹമ്മദ്, പി.എം. കെ. സജിത്കുമാർ, സി ഇ ഒ മാരായ ഹാരിസ്, പ്രവീൺ എന്നിവരും എക്സൈസ് സംഘത്തിൽ ഉണ്ടായിരുന്നു.