കണ്ണൂർ :ജില്ലാ പഞ്ചായത്തിനു കീഴിലുള്ള എല്ലാ സർക്കാർ ഹൈസ്‌കൂളുകൾക്കും ഹയർസെക്കൻഡറി സ്‌കൂളുകൾക്കും ഫോട്ടോസ്റ്റാറ്റ് മെഷീനുകൾ നൽകുന്ന ജില്ലാ പഞ്ചായത്തിന്റെ പദ്ധതിക്ക് തുടക്കമായി. ജില്ലാ പഞ്ചായത്ത് പ്രസിഡന്റ് കെ. വി സുമേഷ് വിതരണോദ്ഘാടനം നിർവഹിച്ചു. സംസ്ഥാനത്ത് ആദ്യമായാണ് ജില്ലാപഞ്ചായത്തിന്റെ നേതൃത്വത്തിൽ ഇത്തരമൊരു പദ്ധതി നടപ്പാക്കുന്നത്. 74 വിദ്യാലയങ്ങൾക്കാണ് ആധുനിക സൗകര്യങ്ങളോടുകൂടിയ ഫോട്ടോ കോപ്പിയർ മെഷീൻ നൽകിയത്.

2019- 20 വർഷത്തെ വാർഷിക പദ്ധതിയിൽ ഉൾപ്പെടുത്തി 72 ലക്ഷം രൂപ ചെലവിലാണ് പദ്ധതി നടപ്പിലാക്കുന്നത്. വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥിന്റെ പ്രത്യേക നിർദേശ പ്രകാരമാണ് ജില്ലാ പഞ്ചായത്ത് ഈ നൂതന ആശയത്തിനു തുടക്കമിട്ടത്. ഫോട്ടോ കോപ്പിയറുകൾ ഹൈസ്‌കൂൾ, ഹയർ സെക്കൻഡറി വിഭാഗങ്ങൾക്ക് ഒരേപോലെ ഉപയോഗിക്കാമെന്ന് പ്രസിഡന്റ് അറിയിച്ചു. നാനൂറിലധികം വിദ്യാർത്ഥികൾ പഠിക്കുന്ന 42 സ്‌കൂളുകൾക്ക് ഒരു മിനിറ്റിനുള്ളിൽ 28 കോപ്പികൾ ലഭിക്കുന്ന കോപ്പിയറുകളും 400ൽ കുറവ് വിദ്യാർത്ഥികൾ ഉള്ള 32 സ്‌കൂളുകൾക്ക് മിനിറ്റിൽ 23 കോപ്പികൾ ലഭിക്കുന്ന കോപ്പിയറുകളുമാണ് വിതരണം ചെയ്തത്.

സ്‌കാനിംഗ്, പ്രിന്റിംഗ് സൗകര്യങ്ങളോടു കൂടിയതാണ് ഫോട്ടോ കോപ്പിയറുകൾ.33 വർഷത്തെ സേവനത്തിനു ശേഷം സർവീസിൽ നിന്ന് വിരമിക്കുന്ന ജില്ലാ വിദ്യാഭ്യാസ ഉപ ഡയറക്ടർ ടി .പി. നിർമ്മലാദേവിക്ക് ജില്ല പഞ്ചായത്ത് പ്രസിഡന്റ് സ്‌നേഹോപഹാരം നൽകി. ജില്ലാ പഞ്ചായത്ത് വൈസ് പ്രസിഡന്റ് പി. പി .ദിവ്യ അദ്ധ്യക്ഷത വഹിച്ചു. സ്ഥിരം സമിതി അദ്ധ്യക്ഷന്മാരായ ടി. ടി .റംല, വി. കെ. സുരേഷ് ബാബു, കെ .പി .ജയബാലൻ എന്നിവർ

പങ്കെടുത്തു.