നാദാപുരം: കക്കട്ട് ടൗണിലെ ജ്വല്ലറിയിൽ പട്ടാപ്പകൽ മോഷണം. ഒരു കിലോഗ്രാം വരുന്ന വെള്ളി ആഭരണങ്ങൾ നഷ്ടമായി. മൊകേരി വടയം സ്വദേശി പാറയുള്ള പറമ്പത്ത് വിജീഷിന്റെ ഉടമസ്ഥതയിലുള്ള ചന്ദ്രിക ജ്വല്ലറിയിലാണ് മോഷണം നടന്നത്. വെള്ളിയാഴ്ച രാവിലെ 11 മണിയോടെയാണ് സംഭവം. പാദസരം വാങ്ങാനെന്ന വ്യാജേന കടയിലെത്തിയ ആളാണ് ആഭരണം കവർന്നത്. ഈ സമയത്ത് കടയിലുണ്ടായിരുന്ന വിജീഷിന്റെ പിതാവ് ബാലൻ ഇയാൾക്ക് പാദസരം കാണിച്ച് കൊടുക്കുകയായിരുന്നു. മോഷ്ടാവ് കടയിലുണ്ടായിരുന്ന പത്രം കൈയിലെടുത്ത് വായിക്കുന്നത് പോലെ അഭിനയിക്കുന്നതിനിടയിൽ നാല് കെട്ടുകളാക്കി വെച്ച വെള്ളി ആഭരണങ്ങൾ പാന്റ്‌സിന്റെ പോക്കറ്റിലാക്കി കടയിൽ നിന്ന് പുറത്തേക്ക് പോവുകയായിരുന്നു. മോഷണത്തിന്റെ ദൃശ്യങ്ങൾ സി സി ടി വി യിൽ പതിഞ്ഞിട്ടുണ്ട്.

സി സി ടി വി ദൃശ്യത്തോടെ വിജീഷ് കുറ്റ്യാടി പൊലീസിൽ പരാതി നൽകി. പൊലീസ് ജ്വല്ലറിയിൽ എത്തി പരിശോധന നടത്തി.