കോഴിക്കോട്: ശ്രീകണ്‌ഠേശ്വര ക്ഷേത്രം ശിവരാത്രി മഹോത്സവത്തോടനുബന്ധിച്ച് നടുവട്ടം - പെരച്ചനങ്ങാടി പ്രാദേശിക കമ്മറ്റിയുടെ ആഘോഷ വരവ് നടത്തി.

കല്ലായ് തറമ്മൽ ശ്രീകുട്ടിച്ചാത്തൻ കാവ് പരിസരത്ത് നിന്ന് ആരംഭിച്ച വരവിന് കൺവീനർ കോട്ടക്കളത്തിൽ പ്രേമൻ, ഭരണ സമിതി അംഗം വേണുഗോപാൽ അടിച്ചിക്കാട്ട്, പ്രവർത്തക സമിതി അംഗങ്ങളായ തമ്പുരാൻകണ്ടി സോമസുന്ദരൻ, കെ. കൃഷ്ണൻ, പരുത്തോളി വിജയൻ, യു.ടി. സുരേഷ്, അവിനാഷ് കെ.വി, ചെഞ്ചേരി രാജശേഖരൻ വാഴയിൽ എന്നിവർ നേതൃത്വം നൽകി. താലപ്പൊലിയും ചെണ്ടമേളവുമുണ്ടായിരുന്നു.

ആഘോഷവരവിന് ക്ഷേത്രത്തിൽ ക്ഷേത്രയോഗം പ്രസിഡന്റ് പി.വി.ചന്ദ്രൻ, വൈസ് പ്രസിഡന്റ് പി.സുന്ദർദാസ്, ജനറൽ സെക്രട്ടറി സുരേഷ്ബാബു എടക്കോത്ത്, ജോയിന്റ് സെക്രട്ടറി കെ.വി.അനേഖ്, ട്രഷറർ കൃഷ്ണദാസ് തച്ചപ്പുളളി, സ്റ്റിയറിംഗ് കമ്മിറ്റി കൺവീനർ ഇ.അനിരുദ്ധൻ, സ്വീകരണ കമ്മിറ്റി കൺവീനർ അനിൽകുമാർ കേലാട്ട് തുടങ്ങിയവർ ചേർന്ന് സ്വീകരണം നൽകി.

രാവിലെ പ്രഭാതപൂജയ്ക്കും വിശേഷാൽ പൂജയ്ക്കും എഴുന്നളളിപ്പിനുശേഷം ആനയൂട്ട് വഴിപാട് നടത്തി. വേണുഗോപാൽ അടിച്ചിക്കാട്ടിന്റെ പേരിലുളള പ്രത്യേക പൂജയും രാവിലെ ശ്രീഒല്ലൂർ ശിവക്ഷേത്രം മാതൃസമിതിയുടെ നാരായണീയ പാരായണവുമുണ്ടായിരുന്നു. ഉച്ചയ്ക്ക് ഇ.കെ.ശിവദാസൻ കണ്ണംചാലിൽ, തണൽ കോട്ടൂളി, കെ.പി. അച്ചുതൻ (രവീന്ദ്രൻ) പളളിമലക്കുന്ന് കോട്ടൂളി എന്നിവരുടെയും മറ്റു ക്ഷേത്ര ഭക്തരുടെയും സഹകരണത്തോടെ അന്നദാനവും നടന്നു. വൈകിട്ട് 6ന് രാഗമാലിക ഭജനസംഘത്തിന്റെ ഭജന, രാത്രി സീനിയർ വിഭാഗം നൃത്തമത്സരം എന്നിവ അരങ്ങേറി.

ഇന്ന് കെ.പി.സദാശിവന്റെ പേരിലുളള വിശേഷാൽ പൂജ നടക്കും. രാവിലെ 9 മുതൽ എടക്കാട് ശ്രീ സുബ്രഹ്മണ്യ ഗണപതി ക്ഷേത്രം ശ്രീനാരായണീയ പാരായണ സമിതി അംഗങ്ങളുടെ നാരായണീയ പാരായണം. എഴുന്നള്ളിപ്പിന് ശേഷം ആനയൂട്ട്, പറവെപ്പ്. ഉച്ചയ്ക്ക് 12 മണി മുതൽ അന്നദാനം. വൈകിട്ട് 6 ന് സത്യസായി ഭജന സമിതി അവതരിപ്പിക്കുന്ന ഭജന, രാത്രി 8.30ന് കസബ പ്രാദേശിക കമ്മിറ്റിയുടെ ആഘോഷ വരവ്, 9 ന് ലാലാ ബാൻഡ് - മേഘ്‌ന ലാൽ നയിക്കുന്ന ഗാനമേള എന്നിവയുമുണ്ടാവും.