കോട്ടയം: നാട്ടകം പോളിടെക്‌നിക്കിന് സമീപം അമിതവേഗത്തിലെത്തിയ കെ.എസ്.ആർ.ടി.സി.ബസ് പാഞ്ഞുകയറി കാൽനട യാത്രക്കാരായ രണ്ട് വിദ്യാർത്ഥികൾക്ക് ഗുരുതര പരിക്ക്. കുമാരനല്ലൂർ സുരേഷ് നിവാസിൽ ബാലകൃഷ്ണന്റെ മകൻ കാർത്തിക്ക് നായർ (21), ഒപ്പമുണ്ടായിരുന്ന പുലിക്കുട്ടിശേരി വലിയപറമ്പിൽ ജ്യോതിഷ് കുര്യൻ (23) എന്നിവർക്കാണ് പരിക്കേറ്റത്. തലയ്ക്ക് പരിക്കേറ്റ ഇവരെ ആശുപത്രിയിൽ പ്രവേശിപ്പിച്ചു. നാട്ടകം പോളിടെക്‌നിക്കിനു മുന്നിൽ പോർട്ടിലേയ്ക്കുള്ള വഴി തിരിയുന്ന ഭാഗത്ത് ഇന്നലെ രാവിലെ പത്തരയോടെയായിരുന്നു അപകടം. നെടുമങ്ങാട് നിന്ന് പാലക്കാട്ടേക്ക് പോകുകയായിരുന്ന ബസാണ് റോഡരികിലൂടെ നടക്കുകയായിരുന്ന ഇരുവരെയും ഇടിച്ചത്. കോളേജ് തുടർ വിദ്യാഭ്യാസ കേന്ദ്രത്തിലെ ലോജിസ്റ്റിക്ക് വിഭാഗത്തിലാണ് ഇരുവരും പഠിക്കുന്നത്. ഓടിക്കൂടിയ നാട്ടുകാർ ചേർന്ന് വിദ്യാർത്ഥികളെ ഇത് വഴി എത്തിയ കാറിൽ ആശുപത്രിയിൽ എത്തിച്ചു. കാർത്തിക്ക് ജനറൽ ആശുപത്രിയിലും, ജ്യോതിഷ് മെഡിക്കൽ കോളജ് ആശുപത്രിയിലും ചികിത്സയിലാണ്. ബസ് ചിങ്ങവനം പൊലീസ് കസ്റ്റഡിയിലെടുത്തു.