വൈക്കം : ഓടിക്കൊണ്ടിരുന്ന ടിപ്പർ ലോറിക്ക് മുകളിലേക്ക് റോഡരികിൽ നിന്ന കൂ​റ്റൻ മരം കടപുഴകി വീണു. ഡ്രൈവറും ക്ലീനറും പരിക്കേൽക്കാതെ അത്ഭുതകരമായി രക്ഷപ്പെട്ടു. സംഭവ സമയത്ത് റോഡിൽ കാൽനട യാത്രക്കാർ ഇല്ലാതിരുന്നതിനാൽ ദുരന്തം ഒഴിവായി. ഇന്നലെ ഉച്ചയ്ക്ക് 2.30 ഓടെ വൈക്കം അംബികാമാർക്ക​റ്റിന് സമീപമാണ് സംഭവം. ആലപ്പുഴയിൽ നിന്നും തലയോലപ്പറമ്പിലേക്ക് മണ്ണ് കയ​റ്റുന്നതിനായി വരികയായിരുന്ന ടിപ്പർ ലോറിക്ക് മുകളിലേക്ക് മരം കടപുഴകി വീഴുകയായിരുന്നു. ഡ്രൈവർ ആലപ്പുഴ സ്വദേശി നികേഷ് (34), ക്ലീനർ തൻസീർ (28)എന്നിവർ അത്ഭുതകരമായി രക്ഷപെട്ടു. ചുവട് ഭാഗം ദ്റവിച്ച മരം കാ​റ്റിൽ കടപുഴകി റോഡിന് കുറുകെ വീഴുകയായിരുന്നു. വൈക്കത്ത് നിന്ന് അസി. സ്​റ്റേഷൻ ഓഫീസർ ടി. ഷാജി കുമാർ ഫയർ ഓഫീസർമാരായ സി.ആർ ജയകുമാർ, രാധാകൃഷ്ണൻ, എം.കെ വിനോദ്, കെ.ആർ രഞ്ജിത്ത് എന്നിവരുടെ നേതൃത്വത്തിൽ ഫയർ യൂണി​റ്റെത്തിയാണ് മരം മുറിച്ച് നീക്കിയത്.സംഭവത്തെ തുടർന്ന് വൈക്കം കുമരകം റോഡിൽ ഒരു മണിക്കൂറോളം വാഹനഗതാഗതം തടസപ്പെട്ടു. മരം വീണതിനെ തുടർന്ന് ടിപ്പറിന്റെ മുൻവശം ഭാഗീകമായി തകർന്നു.