ന്യൂ‌ഡൽഹി: കേന്ദ്ര സർക്കാരിന്റെ 'ബേട്ടി പഠാവോ ബേട്ടി ബചാവോ" പദ്ധതി വൻ വിജയമെന്ന് ധനമന്ത്രി നിർമ്മല സീതാരാമാൻ. ബ‌ഡ്‌ജറ്റ് അവതരണത്തിനിടെയാണ് ധനമന്ത്രിയുടെ പരാമ‍ർശം. സ്‌കൂൾ അഡ്മിഷനിൽ പെൺകുട്ടികളുടെ എണ്ണം ആൺകുട്ടികളെ മറികടന്നെന്നും അവർ പറഞ്ഞു.

ബഡ്‌ജറ്റിൽ കുട്ടികളുടെ പോഷകാഹാര പദ്ധതിക്കായി 3,​56,​000 കോടി രൂപ അനുവദിച്ചു. വനിതാകേന്ദ്രീകൃത പദ്ധതികൾക്കായി 28600 കോടിയും വകയിരുത്തി.

പിന്നാക്ക വിഭാഗത്തിന് കൂടുതൽ ഊന്നൽ നൽകുന്നതാണ് കേന്ദ്ര ബഡ്‌ജറ്റ്. പട്ടികജാതി, ഒബിസി വിഭാഗങ്ങൾക്കായി 85,​000 കോടിയും,​ പട്ടികവർഗ വിഭാഗങ്ങളുടെ വികസനത്തിനത്തിനായി 53,​700 കോടി രൂപയും അനുവദിച്ചു.

2015 ജനുവരി 22നായിരുന്നു പ്രധാനമന്ത്രി നരേന്ദ്രമോദി 'ബേട്ടി പഠാവോ ബേട്ടി ബചാവോ' പദ്ധതി പ്രഖ്യാപിച്ചത്. ഇന്ത്യയിൽ കുറഞ്ഞുവരുന്ന പെൺ ശിശുജനനനിരക്ക് വർധിപ്പിക്കുക, പെൺകുട്ടികളോടുള്ള സമൂഹത്തിന്റെ മനോഭാവത്തിൽ മാറ്റം വരുത്തുക എന്നീ ലക്ഷ്യങ്ങളായിരുന്നു പദ്ധതിയിലൂടെ മുന്നോട്ട് വച്ചിരുന്നത്.