നിപ്പ വൈറസ് ഉണ്ടായിരുന്നപ്പോഴെന്നപോലെ സംസ്ഥാനത്ത് കൊറോണ വൈറസ് റിപ്പോർട്ട് ചെയ്തത് മുതൽ രോഗത്തെക്കുറിച്ചുള്ള സന്ദേശങ്ങളും സോഷ്യൽ മീഡിയയിലൂടെ വ്യാപകമായി പ്രചരിക്കുകയാണ്. അതിൽ ചിലത് വ്യാജമാണ് താനും. പലപ്പോഴും ഏതാണ് സത്യം ഏതാണ് വ്യാജം എന്ന് ജനങ്ങൾക്ക് തിരിച്ചറിയാൻ സാധിക്കാറില്ല.
കൊറോണയുമായി ബന്ധപ്പെട്ട ഒരു സന്ദേശമാണ് മാസ്‌കിന്റെ പച്ച ഭാഗം പുറത്ത്‌ ധരിക്കുന്ന ആൾ രോഗിയും, അകത്തെ ഭാഗം പുറത്തേക്കാക്കി ധരിച്ചാൽ അയാൾ രോഗം തടയാനാണ്‌ മാസ്ക് ധരിക്കുന്നത്‌ എന്നുമുള്ളത്. ഇപ്പോഴിതാ ഈ സന്ദേശം ഫേക്ക് ആണെന്ന് വ്യക്തമാക്കി രംഗത്തെത്തിയിരിക്കുകയാണ് ഡോ. ഷിംന അസീസ്. മാസ്ക് ആര്‌ ധരിക്കുമ്പോഴും പച്ച ഭാഗം പുറത്തായിരിക്കുന്നതാണ്‌ ശരിയെന്ന് ഡോക്ടർ ഫേസ്ബുക്ക് കുറിപ്പിലൂടെ പറയുന്നു.
ഫേസ്ബുക്ക് പോസ്റ്റിന്റെ പൂർണ്ണരൂപം
കൊറോണ വൈറസ് എന്ന് വേണ്ട വായുവിലൂടെ പകരുന്ന ഏത്‌ രോഗവും ഒരു പരിധി വരെ തടയാനുള്ള ശേഷി മാസ്‌കിനുണ്ട്‌.
സാധാരണ നമ്മളുപയോഗിക്കുന്ന പുറത്ത്‌ പച്ച കളറുള്ള മാസ്‌കാണ്‌ സർജിക്കൽ മാസ്ക്. ഇത്‌ ആറ്‌ മണിക്കൂർ വരെ ഉപയോഗിച്ച ശേഷം മാറ്റി വേറെയിടണം.
നിപ്പ സമയത്ത്‌ നമ്മൾ പരിചയപ്പെട്ട താരതമ്യേന കൂടുതൽ സുരക്ഷ തരുന്ന മാസ്‌കാണ്‌ N95 മാസ്ക്. കട്ടി കൂടിയ, ധരിച്ചാൽ ശ്വസിക്കാൻ ബുദ്ധിമുട്ട് തോന്നുന്ന ഈ മാസ്‌കിന്‌ വില കൂടുതലാണ്‌. ഓരോ ദിവസവും വെവ്വേറെ മാസ്ക് ധരിക്കണമെന്നത്‌ ചിലവേറിയ പരിപാടിയാണ്‌. മാത്രമല്ല, ധരിക്കാനുള്ള ബുദ്ധിമുട്ടും(N95 മാസ്ക് വെച്ചിട്ടും ഈസിയായി ശ്വാസം കിട്ടുന്നുണ്ടെങ്കിൽ വെച്ചിരിക്കുന്ന രീതി തെറ്റാണ്‌), നിലവിലെ സാഹചര്യത്തിൽ രോഗികളുമായി നേരിട്ട്‌ ഇടപെടുന്നവർക്കൊഴികെ ഇത്‌ ആവശ്യമില്ല എന്നതും N95 മാസ്‌കിനെ ഒരത്യാവശ്യം അല്ലാതാക്കുന്നു.
ഇനീം കുറേ ടൈപ്പ്‌ മാസ്‌കുണ്ട്‌. അത്‌ പരിചയപ്പെടുത്താനല്ല ഈ പോസ്‌റ്റ്‌. മാസ്‌കിന്റെ പച്ച ഭാഗം പുറത്ത്‌ ധരിക്കുന്ന ആൾ രോഗിയും അകത്തെ ഭാഗം പുറത്തേക്കാക്കി ധരിച്ചാൽ അയാൾ രോഗം തടയാനാണ്‌ മാസ്ക് ധരിക്കുന്നത്‌ എന്നും പറഞ്ഞൊരു മെസേജ്‌ പരക്കുന്നുണ്ട്‌. ഇങ്ങനൊരു സംഗതിക്ക്‌ യാതൊരു ശാസ്‌ത്രീയ അടിസ്‌ഥാനവുമില്ല.
പുറത്തേക്ക്‌ ധരിച്ചിരുന്ന ഭാഗം ശ്രദ്ധിക്കാതെ പിന്നീട്‌ അകത്തേക്ക്‌ ആക്കി ധരിക്കുകയൊന്നും ചെയ്‌തേക്കരുത്‌, നേരെ വിപരീതഫലം ചെയ്യും. ഇടക്കിടക്ക്‌ മാസ്ക് താഴ്‌ത്തിയിട്ട്‌ വീണ്ടും ധരിക്കുകയോ നിലത്ത്‌ വീണ മാസ്ക് വീണ്ടുമിടുകയോ ഒക്കെ ചെയ്‌താൽ മാസ്ക് ധരിക്കുന്ന ഫലം കിട്ടുകയില്ല താനും.
ഇനിയിപ്പോ മെസേജ്‌ കണ്ട്‌ 'രോഗിയാണ്‌' എന്ന് കാണിക്കാൻ പച്ച മാസ്ക് ധരിച്ച്‌ ഇന്റിക്കേറ്ററിടുകയൊന്നും വേണ്ട. ആര്‌ ധരിക്കുമ്പോഴും പച്ച ഭാഗം പുറത്തായിരിക്കുന്നതാണ്‌ ശരി.
ഇപ്പോൾ നിങ്ങൾക്ക്‌ കിട്ടിക്കൊണ്ടിരിക്കുന്ന മെസേജ്‌ ഫേക്കാണ്‌. പണിയില്ലാത്തോർ ഉണ്ടാക്കി വിട്ട ഒന്നാന്തരം ഫേക്ക്. പോവാമ്പ്ര...
Dr. Shimna Azeez