തിരുവനന്തപുരം: ജനങ്ങൾ തിങ്ങിപ്പാർക്കുന്ന സ്ഥലത്ത് അനധികൃതമായി മൊബൈൽ ടവർ നിർമ്മിക്കുന്നതിനെതിരെയുള്ള പരിപാടിയുടെ വേദിയിൽ ഒരാൾ മൊബൈൽ ഫോൺ ഉപയോഗിച്ച് പ്രതിഷേധിച്ചാൽ എങ്ങനെയിരിക്കും? അങ്ങനെയൊരു ചിത്രമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. തിരുവനന്തപുരം വെള്ളായണിയിലെ സ്റ്റുഡിയോ റോഡിൽ സംഘടിപ്പിച്ച പ്രതിഷേധ പരിപാടിയിലായിരുന്നു കൗതുകകരമായ ഈ കാഴ്ച. ചടങ്ങിൽ ഒ.രാജഗോപാൽ എം.എൽ.എയായിരുന്നു ഉദ്ഘാടകൻ. ഇതുമായി ബന്ധപ്പെട്ട് ഒ. രാജഗോപാൽ സംസാരിക്കുമ്പോൾ വേദിയിലിരിക്കുന്ന വ്യക്തി മൊബൈൽ ഫോൺ ഉപയോഗിക്കുകയായിരുന്നു. ഈ ചിത്രം ഒ.രാജഗോപാൽ ഫേസ്ബുക്കിൽ പങ്കുവച്ചതോടെ എം.എൽ.എയുടെ പേജിൽ പരിഹാസരൂപേണയുള്ള കമന്റുകൾ എത്തി. എന്തായാലും ചിത്രം സോഷ്യൽ മീഡിയയിൽ വൈറലാണ്.