തലശ്ശേരി: പ്രണയ ദിനത്തിൽ ആഘോഷങ്ങൾ നടത്താൻ അനുവദിക്കില്ലെന്ന സംഘപരിവാർ സംഘടനകളുടെ ഭീഷണിക്കെതിരെ പുതിയ പ്രതിഷേധവുമായി ഡി.വൈ.എഫ്.ഐ. ഫെബ്രുവരി 14ന് ഡി.വൈ.എഫ്.ഐ കരിയാട് മേഖല കമ്മിറ്റിയാണ് വ്യത്യസ്തമായ പ്രതിഷേധവുമായി രംഗത്തെത്തിയിരിക്കുന്നത്. പൗരത്വ ഭേദഗതി നിയമത്തിനെതിരായി പ്രണയ ലേഖന മത്സരം സംഘടിപ്പിച്ചാണ് ഡി.വൈ.എഫ്.ഐ പ്രതിഷേധിക്കുന്നത്.

ഭിന്നിപ്പിക്കുന്നവരുടെ കാലത്തെ ചേർത്ത് പിടിക്കലുകളാണ് പ്രണയലേഖന മത്സരത്തിലൂടെ ഉദ്ദേശിക്കുന്നത്. പൗരത്വ ഭേദഗതി നിയമത്തിനെതിരെയും പ്രണയിക്കുന്നവരെ തല്ലിയോടിക്കാനെത്തുന്നുവർക്കുമുള്ള സര്‍ഗാത്മകമായ പ്രതിഷേധമാണ് ഈ മത്സരമെന്നും ഡി.വൈ.എഫ്.ഐ കരിയാട് മേഖലാ കമ്മിറ്റി സെക്രട്ടറി പറഞ്ഞു. മത്സരത്തിൽ ഒന്നാം സമ്മാനം നേടുന്ന വിജയിക്ക് 1000 രൂപ വിലവരുന്ന പുസ്തകങ്ങളാണ് സമ്മാനമായി ലഭിക്കുക. നിരവധി പ്രോത്സാഹന സമ്മാനങ്ങളും നൽകും.

പ്രണയ ലേഖനങ്ങൾ അയക്കേണ്ട വിലാസം: സെക്രട്ടറി, ഡിവൈഎഫ്ഐ, കരിയാട് മേഖല കമ്മിറ്റി, ഇഎംഎസ് മന്ദിരം, കരിയാട് സൗത്ത്, പിന്‍-673316 ഇ-മെയില്‍: dyfikariyadmc@gmail.com