ന്യൂഡൽഹി: ഡൽഹിയിലെ തിളക്കമാർന്ന വിജയത്തിൽ ആം ആദ്മിയേയും അരവിന്ദ് കെജ്‌രിവാളിനെയും പ്രധാനമന്ത്രി നരേന്ദ്ര മോദി അഭിനന്ദിച്ചിരുന്നു. ഡൽഹി നിയമസഭാ തിരഞ്ഞെടുപ്പിൽ വിജയം നേടിയ അരവിന്ദ് കെജ്‌രിവാളിനും 'ആപി'നും അഭിനന്ദനങ്ങൾ അറിയിക്കുന്നുവെന്നും ഡൽഹിയിലെ ജനങ്ങളുടെ അഭിലാഷങ്ങൾ നടപ്പിൽ വരുത്താൻ എല്ലാവിധ ആശംസകളും നേരുന്നുവെന്നുമാണ് പ്രധാനമന്ത്രി ട്വിറ്ററിലൂടെ അറിയിച്ചിരിക്കുന്നത്. ചൊവാഴ്ച വൈകുന്നേരം 6.31നാണ് മോദി ഈ ട്വീറ്റ് ചെയ്തത്.

Congratulations to AAP and Shri @ArvindKejriwal Ji for the victory in the Delhi Assembly Elections. Wishing them the very best in fulfilling the aspirations of the people of Delhi.

— Narendra Modi (@narendramodi) February 11, 2020

നിമിഷങ്ങൾക്കകം ഇതിന് മറുപടിയുമായി അരവിന്ദ് കേജ്‌രിവാൾ രംഗത്തെത്തി. 'വളരെയധികം നന്ദിയുണ്ട് സർ,​ രാജ്യത്തിന്റെ തലസ്ഥാന നഗരിയെ ലോകോത്തര നഗരിയാക്കി മാറ്റുവാൻ കേന്ദ്രത്തോടൊപ്പം ചേർന്ന് പ്രവര്‍ത്തിക്കാൻ ശ്രമിക്കുന്നതായിരിക്കും. '- കെജ്‌രിവാൾ മറുപടിയായി ട്വീറ്റ് ചെയ്തു. 6:41 നാണ് കെജ്‌രിവാൾ മറുപടി നൽകിയത്. നിലവിലെ കണക്കുകൾ അനുസരിച്ച് 70ൽ 62 സീറ്റുകൾ ആം ആദ്മിയും 8 സീറ്റുകൾ ബി.ജെ.പിയുമാണ് നേടിയത്.

Thank u so much sir. I look forward to working closely wid Centre to make our capital city into a truly world class city. https://t.co/IACEVA091c

— Arvind Kejriwal (@ArvindKejriwal) February 11, 2020

ഡൽഹി നിയമസഭാ തിരഞ്ഞെടുപ്പിലെ വിജയം ഇന്ത്യൻ ജനതയുടെ വിജയമാണെന്ന് അരവിന്ദ് കെജ്‌രിവാൾ വിജയത്തിന് ശേഷം പ്രതികരിച്ചത്. എ.എ.പിയുടെ ജയം രാജ്യത്തിനുള്ള മുഖ്യസന്ദേശമാണ്. രാജ്യത്തിന്റെയാകെ വിജയമാണ്. ഈ ദിവസം ഭഗവാൻ ഹനുമാൻ ജനങ്ങളുടെ മേൽ അനുഗ്രഹം ചൊരിഞ്ഞിരിക്കുകയാണെന്നും കെജ്‌രിവാൾ പറഞ്ഞു. സ്‌കൂളുകളും ആശുപത്രികളും പണിയുകയും കുറഞ്ഞ വിലയ്‌ക്ക് വൈദ്യുതി നൽകുകയും ചെയ്യുന്നതിനെ ജനങ്ങൾ അംഗീകരിക്കുന്ന പുതിയൊരു രാഷ്ട്രീയത്തിന്റെ ഉദയമാണ് ഡൽഹി നിയമസഭാ തിരഞ്ഞെടുപ്പിൽ കണ്ടതെന്നും അദ്ദേഹം കൂട്ടിച്ചേർത്തു.