ഇടുക്കി: ജനങ്ങളെ ആശങ്കയിലാഴ്ത്തി അജ്ഞാത നമ്പരുകളിൽ നിന്നുള്ള ഫോൺ കോളുകൾ. ഫോണെടുത്താൽ കേൾക്കുന്നത് കുഞ്ഞുങ്ങളുടെയും പെൺകുട്ടികളുടെയും കരച്ചിൽ. രാത്രി10.30 മുതൽ പുലർച്ചെവരെയുള്ള സമയങ്ങളിലാണ് 13 സെക്കൻഡ് ദൈർഘ്യമുള്ള ഇത്തരം കോളുകൾ വരുന്നത്. ജില്ലയിൽ നിരവധിയാളുകൾക്ക് ഇതിനോടകം ഇത്തരത്തിലുള്ള അനുഭവം ഉണ്ടായിക്കഴിഞ്ഞു.

കുഞ്ഞുങ്ങളുടെയും പെൺകുട്ടികളുടെയും കരച്ചിൽ കേൾക്കുന്നതോടെ ഫോൺ എടുക്കുന്നയാൾ പരിഭ്രാന്തരാകും. 13 സെക്കൻഡ് കഴിയുമ്പോൾ ഫോൺകോൾ കട്ടാകും. തിരിച്ച് വിളിച്ചാൽ കിട്ടുകയും ഇല്ല. ഇതിന് പിന്നിൽ വലിയ ചതിയാണ് ഉള്ളതെന്നാണ് സൂചന. ഉപഭോക്താക്കളുടെ വിവരങ്ങൾ ഇത്തരം കോളുകളിലൂടെ ചോർത്തുന്നുണ്ടെന്ന് റിപ്പോർട്ട് ഉണ്ട്.

മിസ്ഡ് കോൾ വരുന്ന നമ്പറിലേക്ക് തിരിച്ച് വിളിച്ചാൽ ഫോണിലെ ബാലൻസ് നഷ്ടമാകുകയും ഫോണിലെ വിവരങ്ങൾ ചോരുകയും ചെയ്യുന്ന തട്ടിപ്പ് രീതിയാണ് വാൻഗിരി. 00252ൽ തുടങ്ങുന്ന നമ്പരുകളിൽ നിന്നാണ് ഇത്തരം കോളുകൾ വരുന്നതെന്നാണ് സൂചന. ഒരേസമയം നിരവധിയാളുകൾക്ക് മിസ്ഡ് കോൾ പോകും,​അതിൽ നിന്ന് തിരിച്ച് വിളിക്കുന്നവരുടെ പണം പോകും.