ബ്യൂണസ് ഐറിസ്: കടലിൽ വച്ച് സെക്സിലേർപ്പെടുന്നതിന് തടസമായ രണ്ട് വയസുള്ള മകളെ ദമ്പതികൾ കഴുത്തറ്റം മണ്ണിൽ കുഴിച്ചിട്ടു. കടൽതീരത്ത് ഉല്ലസിക്കാനെത്തിയ ദമ്പതികളാണ് കുട്ടിയോട് ഈ ക്രൂരകൃത്യം ചെയ്തത്. ലൈംഗിക ബന്ധത്തിലേർപ്പെടുമ്പോൾ കുട്ടിയെ നോക്കാൻ അരുമില്ലാത്തതിനാൽ മണ്ണിൽ കുഴിച്ചിടുകയായിരുന്നെന്ന് ദമ്പതികൾ പറഞ്ഞു. അർജന്റീനയിലെ ബ്യൂണസ് ഐറിസിലെ സാന്റ ക്ലാര ഡെൽമാറിലാണ് സംഭവം.

സംഭവം ശ്രദ്ധയിൽപ്പെട്ടതോടെ പൊലീസ് ദമ്പതികളെ അറസ്റ്റ് ചെയ്തു. അർജന്റീനിയൻ സ്വദേശിയായ 29 കാരനും ഇയാളുടെ പരാഗ്വക്കാരിയായ ഭാര്യയുമാണ് അറസ്റ്റിലായത്. ഇവരിൽ നിന്നും വൻതോതിൽ ലഹരി മരുന്നുകളും കണ്ടെടുത്തിട്ടുണ്ടെന്ന് പൊലീസ് പറഞ്ഞു. വിവരം അറിഞ്ഞ് പൊലീസ് എത്തുമ്പോൾ, ഏകദേശം 35 ഡിഗ്രി സെൽഷ്യസ് ചൂടും, ഭക്ഷണവും കിട്ടാതെ കുട്ടി തളർന്ന അവസ്ഥയിലായിരുന്നു. സൂര്യതാപമേറ്റ് കുട്ടിയുടെ മുഖമാകെ കരുവാളിച്ചിരുന്നതായും പൊലീസ് പറഞ്ഞു. ലഹരിയുടെ ഉന്മാദത്തിലാണ് ഇവർ ഈ ക്രൂരതയ്ക്ക് തുനിഞ്ഞതെന്നും പൊലീസ് സൂചിപ്പിച്ചു.