ദുബായ്: തീപിടിത്തത്തിൽ നിന്ന് ഭാര്യയെ രക്ഷിക്കുന്നതിനിടെ ഗുരുതരമായി പൊള്ളലേറ്റ പ്രവാസി മലയാളിയെ ആശുപത്രിയിൽ പ്രവേശിപ്പിച്ചു. ദുബായിലെ ഉമൽ ഖ്വയിനിലെ അപ്പാർട്ടമെന്റിലുണ്ടായ തീപിടിത്തത്തിൽ നിന്ന് ഭാര്യയെ രക്ഷിക്കുന്നതിനിടെയാണ് സംഭവം. മലയാളിയായ അനിൽ നൈനാൻ, ഭാര്യ നീനു എന്നിവരെ അബുദാബിയിലെ മഫ്റാഖ് ആശുപത്രിയിൽ പ്രവേശിപ്പിച്ചിരിക്കുകയാണെന്ന് ഖലീൽജ് ടൈംസ് റിപ്പോർട്ട് ചെയ്യുന്നു. അനിലിന്റെ ഭാര്യ നീനുവിന് പൊള്ളലേറ്റിട്ടുണ്ടെങ്കിലും പരിക്ക് ഗുരുതരമല്ല.

അനിലിന് 90 ശതമാനം പൊള്ളലേറ്റിട്ടുണ്ടെന്നും നില ഗുരുതരമായി തുടരുകയാണെന്ന് ഡോക്ടർമാർ അറിയിച്ചെന്ന് ആശുപത്രിയിലെ ബന്ധുക്കൾ പറഞ്ഞു. നീനുവിന്റെ ആരോഗ്യസ്ഥിതിയിൽ ഇപ്പോൾ കുഴപ്പമൊന്നുനില്ലെന്നും ബന്ധുക്കൾ പറയുന്നു. ദുബായിൽ ജോലി ചെയ്യുന്ന ഇവർക്ക് നാല് വയസുള്ള മകനുണ്ട്. തിങ്കളാഴ്ച രാത്രിയാണ് ഫ്ലാറ്റിൽ തീപിടിത്തം ഉണ്ടായത്. ഫ്ലാറ്റിലുണ്ടായ ഇലട്രിക് ബോക്സാണ് അപകടത്തിന് കാരണമെന്ന് കരുതുന്നു. അതേസമയം, ഇവർ കേരളത്തിൽ എവിടെയാണെന്ന് സംബന്ധിച്ച വിവരങ്ങൾ ലഭിച്ചിട്ടില്ല.