തിരുവനന്തപുരം: പൊലീസിന്റെ വെടിയുണ്ട കാണാതായ കേസിൽ പ്രതിപട്ടികയിൽ ദേവസ്വം മന്ത്രി കടകം പള്ളി സുരേന്ദ്രന്റെ ഗൺമാൻ സനിൽ കുമാറും. തിരുവനന്തപുരം എസ്.എ.പി കമാന്‍ഡായിരുന്ന വ്യക്തിയുടെ പരാതിയിൽ പേരൂർക്കട പൊലീസ് 2019 ൽ രജിസ്റ്റർ ചെയ്ത കേസിലാണ് ഇയാളെ മൂന്നാം പ്രതിയായി രേഖപ്പെടുത്തിയിരിക്കുന്നത്.

പ്രതിപ്പട്ടികയിൽ ആകെ 11 പേരാണ് ഉള്ളത്. രജിസ്റ്റർ സ്റ്റോക്കുമായി ബന്ധപ്പെട്ട രേഖകളിൽ വരുത്തിയ വീഴ്ചയാണ് പൊലീസുകാർ പ്രതിപ്പട്ടികയിൽ ഇടംപിടിക്കാൻ കാരണം. രേഖകളിൽ തെറ്റായ വിവരങ്ങൾ നൽകി, ​വഞ്ചനയിലൂടെ കൂടുതൽ പൈസയുണ്ടാക്കി എന്നീ കുറ്റങ്ങളാണ് ഇവർക്കെതിരെ എഫ്.ഐ.ആറിൽ രേഖപ്പെടുത്തിയിരിക്കുന്നത്.

എഫ്.ഐ.ആറിൽ ഗുരുതരമായ വീഴ്ചകൾ രേഖപ്പെടുത്തിയിട്ടുണ്ടെങ്കിലും ഇതിനെക്കുറിച്ച് ഉദ്യോഗസ്ഥർ ഇതുവരെ അന്വേഷിച്ചിട്ടില്ലെന്ന് ആരോപണം ഉയർന്നിട്ടുണ്ട്. ഇതുമായി ബന്ധപ്പെട്ട് ക്രൈബ്രാഞ്ച് അന്വേഷണം നടത്തിയേക്കും.