ന്യൂഡൽഹി: ഉപഭോക്തൃ വിപണിയിലേക്കുള്ള പണമൊഴുക്ക് സജീവമായിട്ടില്ലെന്ന സൂചന ശക്തമാക്കി,​ കഴിഞ്ഞമാസം റീട്ടെയിൽ വാഹന വില്പന ഇടിഞ്ഞു. പാസ‌ഞ്ചർ വാഹന വില്പന 4.61 ശതമാനം താഴ്‌ന്ന് 2.90 ലക്ഷം യൂണിറ്റുകളിൽ ഒതുങ്ങിയെന്ന് വിതരണക്കാരുടെ കൂട്ടായ്‌മയായ ഫെഡറേഷൻ ഒഫ് ഓട്ടോമൊബൈൽ ഡീലേഴ്‌സ് അസോസിയേഷൻ (ഫാഡ)​ വ്യക്തമാക്കി.

രാജ്യത്തെ 1,​432 റീജിയണൽ ട്രാൻസ്‌പോർട്ട് ഓഫീസുകളിൽ (ആർ.ടി.ഒ)​ 1,​223 എണ്ണത്തിൽ നിന്നുള്ള വിവരങ്ങൾ കരസ്ഥമാക്കിയാണ് ഫാഡ കഴിഞ്ഞമാസത്തെ വില്പന റിപ്പോർട്ട് തയ്യാറാക്കിയത്. 2019 ജനുവരിയിൽ 3.04 ലക്ഷം പാസഞ്ചർ വാഹനങ്ങൾ പുതുതായി നിരത്തിലെത്തിയിരുന്നു. ടൂവീലർ വില്പന 8.82 ശതമാനം താഴ്‌ന്ന് 12.67 ലക്ഷം യൂണിറ്റുകളിലെത്തി. 82,​187 വാണിജ്യ വാഹനങ്ങളാണ് കഴിഞ്ഞമാസം വിറ്റഴിഞ്ഞത്. നഷ്‌ടം 6.89 ശതമാനം. അതേസമയം,​ മുച്ചക്ര വാഹന വില്പന 9.17 ശതമാനം ഉയർന്ന് 63,​514 യൂണിറ്റുകളായി.

എല്ലാ ശ്രേണികളിലുമായി ആകെ 17.50 ലക്ഷം വാഹനങ്ങളാണ് കഴിഞ്ഞമാസം ഇന്ത്യക്കാർ വാങ്ങിയത്. 7.17 ശതമാനമാണ് നഷ്‌ടം. 2019 ജനുവരിയിൽ 18.85 ലക്ഷം വാഹനങ്ങൾ വിറ്റഴിഞ്ഞിരുന്നു. ബി.എസ്-4ൽ നിന്ന് ബി.എസ്-6ലേക്കുള്ള വാഹനങ്ങളുടെ മാറ്റവും അതു സംബന്ധിച്ച ഉപഭോക്താക്കളുടെ ആശങ്കയും വില്പന കുറയാൻ കാരണമാകുന്നുണ്ട്. വാങ്ങൽത്തീരുമാനം ഉപഭോക്താക്കൾ നീട്ടിവയ്ക്കുകയാണ്.