കൊച്ചി: ആഭരണ പ്രിയരെ നൊമ്പരപ്പെടുത്തി പൊന്നിൻ വിലയുടെ മുന്നേറ്റം. കേരളത്തിൽ പവൻ വില ഇന്നലെ 31,​000 രൂപ കടന്നു. ഇന്നലെ മാത്രം 400 രൂപയാണ് പവന് കൂടിയത്. ഈമാസം അ‌ഞ്ചിന് പവന് 29,​920 രൂപയായിരുന്നു വില. ഇന്നലെ 31,​280 രൂപ. ഇക്കാലയളവിൽ ഗ്രാം വില 170 രൂപ വർദ്ധിച്ചിച്ച് 3,​910 രൂപയിലെത്തി. ഇന്നലെ മാത്രം ഗ്രാമിന് 50 രൂപ കൂടി.

2020ൽ ഇതുവരെ പവന് കൂടിയത് 2,​200 രൂപയാണ്. ഒരുവർഷത്തിനിടെ ഉണ്ടായ വർദ്ധന 7,​560 രൂപ. രാജ്യാന്തര സ്വർണവില ഇന്നലെ ഏഴു വർഷത്തെ ഉയരമായ 1,​626 ഡോളറിലാണുള്ളത്. ഇതു വൈകാതെ 1,​700 ഡോളറിൽ എത്തിയേക്കാം. അങ്ങനെയെങ്കിൽ കേരളത്തിൽ ഗ്രാം വില 4,​000 രൂപ കടക്കും. പവന് കുറഞ്ഞത് 32,​000 രൂപ പ്രതീക്ഷിക്കാം.

ഉത്തേജക വൈറസ്

കൊറോണ വൈറസ് ആഗോള സമ്പദ്‌മേഖലയെ തളർത്തുകയാണെങ്കിലും സ്വർണത്തിനത് ഉത്തേജകമാണ്. ആഗോള ഓഹരി - കടപ്പത്ര വിപണികളിൽ നിന്ന് നിക്ഷേപം വൻതോതിൽ ഇടിയുകയാണ്. സുരക്ഷിത നിക്ഷേപമെന്ന നിലയിൽ സ്വർണത്തിന് ഡിമാൻഡ് കൂടുന്നു. കൊറോണ ഭീതി ഒഴിഞ്ഞ്,​ ചൈന സാധാരണ നിലയിൽ എത്തുംവരെ ഈ സ്ഥിതി തുടർന്നേക്കും.