ന്യൂഡൽഹി: യാത്രക്കാർക്ക് മുന്നിൽ ഫിറ്റ്‌നെസ് ചലഞ്ചുമായി റെയിൽവേ. ഡൽഹി ആനന്ദ് വിഹാർ റെയിൽവേ സ്റ്റേഷനിൽ സ്ഥാപിച്ചിരിക്കുന്ന ഫിറ്റ്നസ് മെഷീനിൽ അല്പനേരം വ്യായാമം ചെയ്താൽ പ്ലാറ്റ്ഫോം ടിക്കറ്റ് സൗജന്യമായി ലഭിക്കും. റെയിൽവേ മന്ത്രി പീയൂഷ് ഗോയൽ ഇതിന്റെ വീഡിയോ ട്വിറ്ററിൽ പങ്കുവച്ചു. 'ഫിറ്റ്നെസിനെ പ്രോത്സാഹിപ്പിക്കുന്നതിനായി ദില്ലിയിലെ ആനന്ദ് വിഹാർ റെയിൽവേ സ്റ്റേഷനിൽ പരീക്ഷണാർത്ഥം ഒരു മെഷീൻ സ്ഥാപിച്ചിരിക്കുകയാണ്. ഈ മെഷീന് മുന്നിൽ നിന്ന് വ്യായാമം ചെയ്ത ശേഷം പ്ലാറ്റ് ഫോം ടിക്കറ്റ് ഫ്രീയായി നേടാവുന്നതാണ്' - വീഡിയോയ്ക്കൊപ്പം മന്ത്രി കുറിച്ചു. ഫ്രീയായി ടിക്കറ്റ് കിട്ടുന്നതായതുകൊണ്ട് തന്നെ ചലഞ്ച് ഏറ്റെടുക്കാൻ ആളുകളുടെ ക്യൂ നിൽക്കുകയാണെന്നാണ് റിപ്പോർട്ട്. പലരും പദ്ധതിയെ അഭിനന്ദിച്ച് രംഗത്ത് വന്നിട്ടുണ്ട്.