വർഷങ്ങൾക്ക് ശേഷം അനൂപ് സത്യന്റെ വരനെ ആവശ്യമുണ്ട് എന്ന ചിത്രത്തിലൂടെ ഗംഭീര തിരിച്ചുവരവാണ് സുരേഷ് ഗോപി നടത്തിയിരിക്കുന്നത്. ചിത്രം റീലീസായതിന് ശേഷം സുരേഷ് ഗോപി സിനിമയിൽ തന്നെ തുടരണമെന്ന് ആവശ്യപ്പെട്ട് നിരവധി പേരാണ് സോഷ്യൽ മീഡിയയിലൂടെ രംഗത്തെത്തിയിരുന്നത്. എന്നാൽ ഇപ്പോൾ താരം ഫേസ്ബുക്കിൽ പങ്കുവച്ച ചിത്രമാണ് ആരാധകർക്കിടയിൽ ചർച്ചയായിരിക്കുന്നത്.

സുരേഷ് ഗോപി നായകനാകുന്ന കാവൽ എന്ന ചിത്രത്തിന്റെ സ്റ്റില്ലാണ് പുറത്തുവിട്ടിരിക്കുന്നത്. നിഥിൻ രണ്ജി പണിക്കർ സംവിധാനം ചെയ്യുന്ന ചിത്രം ആക്ഷന് പ്രധാന്യം നൽകുന്ന ചിത്രമാണെന്നാണ് പുറത്തുവരന്ന റിപ്പോർട്ടുകൾ. ഒരു ആശുപത്രിയിൽ വച്ച് പൊലീസുകാരനെ ചുമരോടു ചേർത്തു നിർത്തി മുട്ടുകൊണ്ടിടിക്കുന്ന ചിത്രമാണിത്. 'സത്യം തെളിയുന്നതുവരെ, കുടുംബത്തിനും, നിങ്ങള്‍ക്കും കാവലായി ഞാനും, എനിക്ക് കാവലായി ദൈവവും ഉണ്ട്. എന്ന കുറിപ്പോടെയാണ് ചിത്രം പങ്കുവച്ചത്.

എന്നാൽ മോഹൻലാൽ ചിത്രമായ ലൂസിഫറിൽ സമാനമായ രംഗമുണ്ടെന്ന് ചൂണ്ടിക്കാട്ടി ഒരു വിഭാഗം രംഗത്തെത്തി. ഇത് ലൂസിഫറിന്റെ കോപ്പിയാണെന്ന് സീൻ ഒഴിവാക്കണമെന്നും ഒരാൾ കമന്റ് ബോക്സിൽ കുറിച്ചു. എന്നാൽ ഇതിന് മറുപടിയുമായി സുരേഷ് ഗോപി രംഗത്തെത്തി. 'ഒരിക്കലുമല്ല... ഇത് 2001ൽ പുറത്തിറങ്ങിയ രണ്ടാംഭാവം എന്ന ചിത്രത്തിൽ നിന്ന് മാറ്റം വരുത്തിയതാണ്. സുരേഷ് ഗോപി കുറിച്ചു