തിരുവനന്തപുരം: പൗരത്വ ഭേദഗതി നിയമത്തിനെതിരെ മാനാഞ്ചിറ സ്​ക്വയറിന്​ സമീപം പ്രതിഷേധിച്ച ബിന്ദു അമ്മിണിയെ പൊലീസ് കസ്റ്റഡിയിലെടുത്തു. സമരത്തി​ന്റെ ഭാഗമായി നടത്തിയ ബക്കറ്റ്​ പിരിവ് ചോദ്യം ചെയ്​ത്​ സി.എ.എ അനുകൂലികളായ രണ്ട്​ യുവാക്കൾ തർക്കമുണ്ടാക്കിയതിനെ തുടർന്ന് അറസ്റ്റ്. ശനിയാഴ്​ച വൈകുന്നേരം ഏഴരയോടെയാണ്​ സംഭവം. അതേസമയം കേരളത്തിൽ ഡൽഹി ആവർത്തിക്കാൻ അനുവദിക്കില്ലെന്ന് ബിന്ദു അമ്മിണി ഫേസ്ബുക്കിലൂടെ വ്യക്തമാക്കി.

സി.എ.എ വിരുദ്ധ സമരം ചെയ്യുന്നതിന് സംഘപരിവാറുകാര​ന്റെ ഭീഷണിയും കേരള പോലീസി​ന്റെ അറസ്റ്റുമാണുണ്ടായതെന്ന്​ അവർ പറയുന്നു. സമരം ചെയ്യുന്നവരെ അറസ്റ്റു ചെയ്ത് സി.എ.എ വിരുദ്ധ സമരം തകർക്കാമെന്ന് കേരളത്തിൽ വ്യാമോഹിക്കേണ്ടെന്നും കേരള ജനത അത് അനുവദിക്കില്ലെന്നും ബിന്ദു കൂട്ടിച്ചേർത്തു.

'സമാധാനപരമായി ​നോട്ടീസ്​ വിതരണം ചെയ്യുകയായിരുന്ന തങ്ങളെ പൊലീസ്​ സ്റ്റേഷനിലെത്തിക്കുകയായിരുന്നു. ഒരു നോട്ടീസ്​ വിതരണത്തിന്​ കേരളത്തിൽ സ്വാതന്ത്ര്യമില്ലെങ്കിൽ എവിടെയാണ്​ സ്വാതന്ത്ര്യമുള്ളത്. സംഘ​പരിവാറുകാരനെ കൂട്ടുപിടിച്ചുകൊണ്ട്​ രണ്ട്​ പൊലീസുകാർ തങ്ങളെ സ്റ്റേഷനിലെത്തിക്കുകയാണുണ്ടായത്'​. കേരളത്തിൽ ഡൽഹി ആവർത്തിക്കാൻ അനുവദിക്കില്ലെന്നും ജനാധിപത്യ കേരളത്തിലെ പുരോഗമനവാദികളായ ആളുകൾ ഒപ്പമുണ്ടാകുമെന്ന്​പ്രതീക്ഷിക്കുന്നതായും ബിന്ദു അമ്മിണി ഫേസ്​ബുക്ക്​ ലൈവിൽ പറഞ്ഞു.