കോന്നി : കുട്ടികൾക്കെതിരെ ഉണ്ടാകുന്ന ലൈംഗിക അതിക്രമങ്ങൾ തടയാൻ കേരള പൊലീസിന്റെ പുതിയ പദ്ധതി 'മാലാഖ' യ്ക്ക് കോന്നിയിൽ തുടക്കമായി. പദ്ധതിയുടെ പ്രചരണാർത്ഥം കോന്നി ജനമൈത്രി പൊലീസ് വി.എൻ.എസ് കോളേജ് വിദ്യാർത്ഥികളുടെ സഹകരണത്തോടെ ഫ്ളാഷ് മോബും തെരുവുനാടകയും സംഘടിപ്പിച്ചു. കുട്ടികളുടെ സുരക്ഷയ്ക്കായി ഇവരുമായി അടുത്ത ബന്ധം പുലർത്തുന്ന രക്ഷാകർത്താക്കൾ, അദ്ധ്യാപകർ, ബന്ധുക്കൾ, പൊലീസുദ്യോഗസ്ഥർ, ഡോക്ടർമാർ, ആരോഗ്യ മേഖലയിലെ ജീവനക്കാർ, മാദ്ധ്യമപ്രവർത്തകർ എന്നിവർക്ക് ബോധവത്കരണം നൽകുകയാണ് ലക്ഷ്യം.

മാർച്ച് 31 വരെ നീളുന്ന രീതിയിലാണ് വിവിധ തരത്തിലുളള പരിപാടികൾ സംഘടിപ്പിച്ചിരിക്കുന്നത്. കുട്ടികൾക്കുനേരെയുണ്ടാകുന്ന അതിക്രമങ്ങൾക്കെതിരെ സന്ദേശങ്ങൾ പതിപ്പിച്ച 'വാവ എക്‌സ്പ്രസ്' എന്ന പേരിലുളള പ്രചരണ വാഹനം ബോധവത്കരണം നടത്തും. ഘോഷയാത്രകൾ, സാംസ്‌കാരിക പരിപാടികൾ, നാടകങ്ങൾ, തെരുവു നാടകങ്ങൾ, പൊതുപരിപാടികൾ, പൊലീസ് ഇതര വിഭാഗങ്ങളെ പങ്കെടുപ്പിച്ചുകൊണ്ടുളള പൊതുപരിപാടികൾ, പൊലീസിലെ കലാകാരൻമാർ അവതരിപ്പിക്കുന്ന പൊതുജന അവബോധ പരിപാടികൾ തുങ്ങിയവയിലൂടെ കുട്ടികൾക്കെതിരെയുളള കു​റ്റകൃത്യങ്ങൾ തടയുന്നതിന് ആവശ്യമായ ബോധവത്കരണം നൽകും. കോന്നി സി.ഐ എസ്. അഷാദ്, ജനമൈത്രി ബീറ്റ് പൊലീസ് ഓഫീസർ സുബീക് റഹീം, ജയശ്രീ എന്നിവർ നേതൃത്വം നൽകി.