പത്തനംതിട്ട : സംസ്ഥാന സാക്ഷരതാമിഷനും പൊതുവിദ്യാഭ്യാസ വകുപ്പും സംയുക്തമായി നടത്തുന്ന 10-ാം ക്ലാസ് തുല്യതാപരീക്ഷയിൽ 93.73 ശതമാനം വിജയം നേടി പത്തനംതിട്ട ജില്ല സംസ്ഥാനത്ത് ഒന്നാമത് എത്തി. ജില്ലയിൽ 367 പേർ രജിസ്റ്റർ ചെയ്തതിൽ 344 പേർ വിജയിച്ചു. ജില്ലയിൽ പരീക്ഷ എഴുതിയ നാല് ട്രാൻസ്‌ജെന്റർ പഠിതാക്കളും വിജയിച്ചു. മലയാളം, ഇംഗ്ലീഷ്, സോഷ്യൽ സയൻസ്, ഗണിതം എന്നിവയിൽ 60 മാർക്കിന്റെ എഴുത്ത് പരീക്ഷയും 20സി.ഇമാർക്കും ആണ്. ഹിന്ദിക്ക് 40 മാർക്കിന്റെ എഴുത്ത് പരീക്ഷയും 10 മാർക്ക് സി.ഇയും ഉർജതന്ത്രം, രസതന്ത്രം, ജീവശാസ്ത്രം, ഇൻഫർമേഷൻ ടെക്‌നോളജി എന്നിവയ്ക്ക് 40 മാർക്കിന്റെ എഴുത്ത് പരീക്ഷയും 10 മാർക്കിന്റെ സി.ഇയും ഉൾപ്പെടുത്തിയാണ് പരീക്ഷാഫലം തയാറാക്കുന്നത്. 2019 നവംബറിൽ നടന്ന നാലാം ക്ലാസ് തുല്യതാ പരീക്ഷയിലും ഏഴാം ക്ലാസ് തുല്യതാ പരീക്ഷയിലും പത്തനംതിട്ട ജില്ല 100 ശതമാനം വിജയം നേടി സംസ്ഥാനത്ത് ഒന്നാം സ്ഥാനത്ത് എത്തിയിരുന്നതായി ജില്ലാ സാക്ഷരതാ മിഷൻ ജില്ലാ കോഓർഡിനേറ്റർ ഡോ.വി.വി മാത്യു പറഞ്ഞു.
ഏറ്റവും കുറവ് വിജയ ശതമാനം ഇടുക്കി ജില്ലയ്ക്കാണ് (79.47ശതമാനം) 2019 ഡിസംബർ 21മുതൽ 31 വരെ നടന്ന പരീക്ഷയിൽ സംസ്ഥാനത്ത് ആകെ 17082 പേർ പങ്കെടുത്തതിൽ 15345 പേർ വിജയിച്ചു. വിജയശതമാനം 89.83 ആണ്. പൊതുപരീക്ഷയിൽ തോറ്റവർക്കായി സേ പരീക്ഷ നടത്തും. കൂടുതൽ വിവരത്തിന് ഫോൺ : 04682220799.