അ​ഞ്ചാ​ലും​മൂ​ട്: പൊ​ലീ​സ് സ്റ്റേ​ഷൻ തൊ​ട്ട​ടു​ത്തു​ണ്ടാ​യി​ട്ടും അ​ഞ്ചാ​ലും​മൂ​ട് ജം​ഗ്​ഷ​ന്റെ ഹൃദയഭാഗത്ത് തന്നെ പ​ര​സ്യ​മ​ദ്യ​പാ​ന​വും മോ​ഷ​ണ​വും നി​ത്യ​സം​ഭ​വ​മാകുന്നു. കോർ​പ്പ​റേ​ഷൻ വ​ക ഓ​പ്പൺ എ​യർ ഓ​ഡി​റ്റോ​റി​യ​ത്തി​ലാ​ണ് മ​ദ്യ​പാ​ന​വും മ​റ്റ് സാ​മൂ​ഹ്യവി​രു​ദ്ധ ​പ്ര​വർ​ത്ത​ന​ങ്ങ​ളുമുൾപ്പെടെ അ​ര​ങ്ങേ​റു​ന്ന​ത്. ഓഡിറ്റോറിയം ചു​റ്റു​മ​തിൽ കെ​ട്ടി മ​റ​ച്ചി​രി​ക്കു​ന്ന​തി​നാൽ ഇവയൊന്നും പു​റ​ത്തു​ള്ള​വർ അ​റി​യുന്നില്ലെന്ന് മാത്രം.

 മോഷണം പതിവ്, കാമറകളും ഇല്ല

ഇ​രു​ച​ക്ര വാ​ഹ​ങ്ങൾ ഉൾപ്പെടെയു​ള്ള വാ​ഹ​ന​ങ്ങൾ​ക്ക് പാർ​ക്കിം​ഗ് സൗ​ക​ര്യം ഒ​രു​ക്കി​യി​രി​ക്കു​ന്ന​തും ഇതേ സ്ഥലത്ത് ത​ന്നെ​യാ​ണ്. വാ​ഹ​ന​ങ്ങൾ പാർ​ക്ക് ചെ​യ്​ത് ദൂ​ര​സ്ഥ​ല​ങ്ങ​ളിൽ ജോ​ലി​ക്കാ​യി പോ​കു​ന്ന​വ​രു​ടെ വാ​ഹ​ന​ങ്ങ​ളും ഇ​ത്ത​ര​ത്തിൽ മൈ​താ​ന​ത്ത് പാർ​ക്ക് ചെ​യ്യു​ന്നു​ണ്ട്. ഇ​ത്ത​രം വാ​ഹ​ന​ങ്ങ​ളിൽ നി​ന്ന് ഹെൽ​മെറ്റ്, ബാ​ഗു​ക​ളിൽ സൂ​ക്ഷി​ച്ചി​രി​ക്കു​ന്ന വി​ല​പി​ടി​പ്പു​ള്ള രേ​ഖ​ക​ൾ എന്നിവ മോഷണം പോകുന്ന സംഭവങ്ങൾ നിരവധിയാണ്. ഓഡിറ്റോറിയത്തിനുള്ളിൽ സി.സി.ടി.വി കാമറകൾ സ്ഥാപിച്ചിട്ടില്ലാത്തതിനാൽ മോഷ്ടാക്കളെ പിന്നീട് കണ്ടെത്താനും ബുദ്ധിമുട്ടാണ്.

 പൊലീസ് സ്റ്റേഷൻ നൂറ് മീറ്റർ അകലെ

നൂ​റ് മീ​റ്റ​റി​ന​പ്പു​റം പൊ​ലീ​സ് സ്റ്റേ​ഷൻ ഉ​ണ്ടാ​യി​ട്ടും സ​ഹാ​യം ആ​വ​ശ്യ​പ്പെ​ട്ടാൽ പ​രാ​തി നൽ​കി​യാൽ മാ​ത്രം അ​ന്വേ​ഷി​ക്കു​മെ​ന്നാണ് പൊലീസിന്റെ മറുപടിയെന്ന് നാട്ടുകാർ പറയുന്നു. എ​ന്നാൽ മി​ക്ക ദി​വ​സ​ങ്ങ​ളി​ലും ഇതിന് സമീപത്തായി പൊലീസ് വാ​ഹ​ന പ​രി​ശോ​ധ​ന ന​ട​ത്താ​റു​ണ്ട്. പ​രി​ശോ​ധ​നയ്ക്കിടെ ഒ​രു പൊ​ലീ​സ് ഉദ്യോ​ഗ​സ്ഥ​നെ​ങ്കി​ലും ഓ​ഡി​റ്റോ​റി​യം പ​രി​ശോ​ധി​ച്ചാൽ ഇവിടെ നിത്യസംഭവമായ മോ​ഷ​ണ​വും പ​ര​സ്യ​മ​ദ്യ​പാ​ന​വും ന​ട​ത്തു​ന്ന​വ​രെ പി​ടി​കൂ​ടാൻ സാ​ധി​ക്കു​മെ​ന്ന​തിൽ സം​ശ​യ​മി​ല്ല.

ഓഡിറ്റോറിയത്തിനുള്ളിൽ മ​ദ്യ​പി​ച്ച് ല​ക്കു​കെ​ട്ട്​ കി​ട​ക്കു​ന്ന​വർ ഇ​വി​ടെ നി​ത്യ​കാ​ഴ്​ച​യാ​ണ്. ഇ​തേ​പ്പ​റ്റി പൊ​ലീ​സി​നെ അ​റി​യി​ച്ചാൽ 'അ​വി​ടെ കി​ട​ക്ക​ട്ടെ' എ​ന്ന നി​ല​പാ​ടാ​ണ് ഉദ്യോഗസ്ഥർക്കെന്ന് നാ​ട്ടു​കാർ പ​റ​യു​ന്നു.