കൊല്ലം എസ്.എൻ കോളേജിനെ ബൗദ്ധിക കേന്ദ്രമാക്കുക ലക്ഷ്യം

കൊല്ലം: ശ്രീനാരായണ കോളേജ് വാർഷിക അക്കാദമിക് പരിപാടികളുടെ ഭാഗമായുള്ള സെമിനാർ പരമ്പര 'അഗോറ 2020' ഇന്ന് ആരംഭിക്കുമെന്ന് പ്രിൻസിപ്പൽ ഡോ.ആർ.സുനിൽകുമാർ വാർത്താ സമ്മേളനത്തിൽ അറിയിച്ചു. രാവിലെ 10ന് കോളേജ് ഓഡിറ്റോറിയത്തിൽ കേരള സർവകലാശാല മുൻ പ്രോ വൈസ് ചാൻസലർ ഡോ.ജെ.പ്രഭാഷ് ഉദ്ഘാടനം ചെയ്യും. കാലിക്കറ്റ് സർവകലാശാലയിലെ പ്രൊഫ.പി.കെ.പോക്കർ പങ്കെടുക്കും. കൊല്ലം ശ്രീനാരായണ കോളേജിനെ ബൗദ്ധിക കേന്ദ്രമാക്കി മാറ്റുകയാണ് സെമിനാർ പരമ്പരയുടെ ലക്ഷ്യം. ഇതിന്റെ ഭാഗമായി കോളേജിലെ 22 പഠന വകുപ്പുകളും അക്കാദമിക് സെമിനാറുകൾ, ചർച്ചകൾ തുടങ്ങിയവ നടത്തും. അതത് മേഖലകളിലെ അക്കാദമിക് വിദഗ്ദ്ധർ പങ്കെടുക്കുന്ന സെമിനാറുകളിൽ ബിരുദ, ബിരുദാനന്തര ഗവേഷണ വിദ്യാർത്ഥികൾ പ്രബന്ധങ്ങൾ അവതരിപ്പിക്കും. ലോകത്ത് ആദ്യമായി പ്രത്യക്ഷ ജനാധിപത്യം പരീക്ഷിച്ച ഗ്രീക്ക് നഗരമായ ഏഥൻസിൽ ചിന്തകൻമാർക്കും പൊതുജനങ്ങൾക്കും ഒരുപോലെ ഒത്തുകൂടാനും ജനാധിപത്യ ചർച്ചകൾ നടത്താനുമുള്ള ഇടമായിരുന്നു അഗോറ. സെമിനാർ പരമ്പര മാർച്ച് പത്തിന് സമാപിക്കും. സമാപന സമ്മേളനത്തിൽ എം.എ.ബേബി, ഡോ.എസ്.പി ഉദയകുമാർ തുടങ്ങിയവർ പങ്കെടുക്കും.