തിരുവനന്തപുരം: 2019-20 അദ്ധ്യയന വർഷത്തിൽ ജില്ലയിലെ വിവിധ സ്‌കൂളുകൾ കേന്ദ്രീകരിച്ച് കേരളകൗമുദി ബോധപൗർണമി ക്ലബ് സംഘടിപ്പിച്ച ലഹരി വിരുദ്ധ സെമിനാറുകളുടെ സമാപന സമ്മേളനം ബാർട്ടൺഹിൽ എൻജിനിയറിംഗ് കോളേജ് ആഡിറ്റോറിയത്തിൽ നടന്നു. സമ്മേളനം സംസ്ഥാന എക്സൈസ് കമ്മിഷണർ ആനന്ദകൃഷ്ണൻ ഉദ്ഘാടനം ചെയ്‌തു. കോളേജ് പ്രിൻസിപ്പൽ കെ. സുരേഷ് അദ്ധ്യക്ഷനായി. ലയൺസ് ക്ലബ് 318A ഡിസ്ട്രിക്ട് ഗവർണർ ഡോ.എ.ജി. രാജേന്ദ്രൻ മുഖ്യാതിഥിയായിരുന്നു. കേരളകൗമുദി യൂണിറ്റ് ചീഫ് കെ. അജിത്കുമാർ ബോധപൗർണമി സന്ദേശം നൽകി. അടൂർ ഡിവൈ.എസ്.പി ജവഹർ ജനാർത്ഥ്, എക്സൈസ് സി.ഐ വൈ. ഷിബു, സി.ഐ നജ്മുദീൻ, എസ്.ഐ ഷറഫുദ്ദീൻ, ട്രിവാൻഡ്രം സിറ്റി ലയൺസ് ക്ലബ് സെക്രട്ടറി ബിനു കെ. സുകു, റോട്ടറി റവന്യൂ ഡിസ്ട്രിക്ട് ചെയർമാൻ വിനോദ് കുമാർ, ട്രിവാൻഡ്രം ടവേഴ്സ് പ്രസിഡന്റ് ദീപു തുടങ്ങിയവരെ ചടങ്ങിൽ ആദരിച്ചു. എക്സൈസ് കമ്മിഷണർ ആനന്ദകൃഷ്ണന് കേരളകൗമുദിയുടെ ഉപഹാരം യൂണിറ്റ് ചീഫ് കെ. അജിത്കുമാർ നൽകി. കേരളകൗമുദി നൽകിവരുന്ന ഈ വർഷത്തെ ലഹരി വിരുദ്ധ സന്ദേശ വ്യാപന പുരസ്‌കാരം നെയ്യാറ്റിൻകര കുളത്തൂർ ഹൈസ്‌കൂളിലെ സൂര്യാ സുന്ദറിന് നൽകി. ബാർട്ടൺഹിൽ എൻജിനിയറിംഗ് കോളേജ് യൂണിയൻ ഭാരവാഹികൾ, ' വെളിച്ചം' സംഘാടകർ , ട്രിവാൻഡ്രം സിറ്റി ലയൺസ് ക്ലബ്, ട്രിവാൻഡ്രം ടവേഴ്സ് തുടങ്ങിയവർ സമ്മേളനത്തിൽ പങ്കെടുത്തു. കോളേജ് യൂണിയൻ ചെയർപേഴ്സൺ നൗഫിയ മോൻ സ്വാഗതവും കേരളകൗമുദി അസിസ്റ്റന്റ് സർക്കുലേഷൻ മാനേജർ കല .എസ്.ഡി നന്ദിയും പറഞ്ഞു. തുടർന്ന് ജനമൈത്രി പൊലീസ് അവതരിപ്പിച്ച ' ഒരു മദ്യപാനിയുടെ ആത്മകഥ' എന്ന നാടകവും നടന്നു.