എരുമപ്പെട്ടി: ദേശമംഗലം കൊറ്റമ്പത്തൂരിൽ കാട്ടുതീ തടയാൻ ശ്രമിക്കവേ വെന്തുമരിച്ച ഫോറസ്റ്റ് വാച്ചർമാരുടെ കുടുംബാംഗങ്ങൾക്ക് ധനസഹായമായി 8.5 ലക്ഷം രൂപ വീതം അനുവദിക്കുമെന്ന് തദ്ദേശ സ്വയംഭരണ മന്ത്രി എ.സി. മൊയ്തീൻ അറിയിച്ചു. 5 ലക്ഷം രൂപ സർക്കാരിൽ നിന്ന് ലഭ്യമാക്കും. പെരിയാർ ടൈഗർ ഫൗണ്ടേഷൻ 2.5 ലക്ഷം രൂപയും വൈൽഡ് ലൈഫ് സൊസൈറ്റി ഒരു ലക്ഷം രൂപയും നൽകും. ഇതിൽ 2 ലക്ഷം അടിയന്തര സഹായമായി നൽകും. കാട്ടുതീയിൽ പെട്ട് മരിച്ചവരുടെ കുടുംബത്തിൽ ഒരാൾക്ക് ജോലി നൽകുന്ന കാര്യത്തിൽ സർക്കാർ തലത്തിൽ ആലോചിച്ച് ഉചിതമായ തീരുമാനം എടുക്കും. മരണാനന്തര ചടങ്ങുകൾക്കും ചികിത്സയ്ക്കുമുള്ള ചെലവുകൾ സർക്കാർ വഹിക്കുമെന്നും മന്ത്രി പറഞ്ഞു.