ഒരു കമ്പനിയുടെ തന്നെ മൂന്ന് യാത്രാക്കപ്പലുകൾ. ഒരിക്കലും മുങ്ങില്ലെന്ന് കരുതിയ ആ മൂന്ന് കപ്പലുകളും കടലാഴങ്ങളിൽ മറഞ്ഞു. ബ്രിട്ടീഷ് കമ്പനിയായ വൈറ്റ് സ്റ്റാർ ലൈൻ കമ്പനിയുടേതായിരുന്നു ആ കപ്പലുകൾ. ആർ.എം.എസ് ഒളിമ്പിക്, ആർ.എം.എസ് ടൈറ്റാനിക്, എച്ച്.എം.എച്ച്.എസ് ബ്രിട്ടാനിക് എന്നിവയാണ് വൈറ്റ് സ്റ്റാർ ലൈൻ തങ്ങളുടെ ഒളിമ്പിക് ക്ലാസ് പരമ്പരയിൽ നീറ്റിലിറക്കിയ മൂന്ന് പടുകൂറ്റൻ കപ്പലുകൾ. അന്ന് നിർമിക്കപ്പെട്ടവയിൽ ഏറ്റവും വലുതും ആഢംബരപൂർണവുമായിരുന്നു ഇവ മൂന്നും. ഈ മൂന്ന് കപ്പലുകളിലും ജോലി ചെയ്‌ത ഐറിഷ് നഴ്സാണ് വയലറ്റ് ജെസോപ്. തികച്ചും അവിശ്വസനീയവും അത്ഭുതകരവുമാണ് വയലറ്റിന് ഈ കപ്പലുകളുമായുള്ള ബന്ധം. ഈ കപ്പലുകൾ മൂന്നും കടലിൽ മുങ്ങുമ്പോൾ ഉള്ളിൽ വയലറ്റുമുണ്ടായിരുന്നു. മൂന്ന് ദുരന്തങ്ങളിൽ നിന്നും വയലറ്റ് അത്ഭുതകരമായി രക്ഷപ്പെടുകയും ചെയ്‌തു. 'മിസ് അൺസിങ്കബിൾ ' എന്നാണ് പിന്നീട് വയലറ്റ് അറിയപ്പെട്ടത്.

1911ൽ വൈറ്റ് സ്‌റ്റാർ ലൈനിന്റെ ആർ.എം.എസ് ഒളിമ്പിക്കിൽ വയലറ്റിന് ശുശ്രൂഷകയായി ജോലി ലഭിച്ചു. സതാംപ്ടണിൽ നിന്നും പുറപ്പെട്ട ഒളിമ്പിക്, ബ്രിട്ടീഷ് യുദ്ധക്കപ്പലായ എച്ച്.എം.എസ് ഹോക്കുമായി കൂട്ടിയിടിച്ചു. തൊട്ടടുത്ത വർഷം 1912ൽ വയലറ്റിന്റെ 24ാം വയസിലാണ് അടുത്ത ദുരന്തം. അന്ന് ടൈറ്റാനിക്കിലായിരുന്നു വയലറ്റിനെ നിയോഗിച്ചിരുന്നത്. അറ്റ്ലാന്റിക് സമുദ്രത്തിൽ മഞ്ഞു മലയിലിടിച്ച് ആദ്യ യാത്രയിൽ തന്നെ ടൈറ്റാനിക് മുങ്ങി. 1500 ലേറെ പേരാണ് ടൈറ്റാനിക് തകർന്ന് മരിച്ചത്. ലൈഫ് ബോട്ടിൽ രക്ഷപ്പെടാൻ സാധിച്ച വയലറ്റിനെയും മറ്റും കാർപേത്യ എന്ന കപ്പലാണ് രക്ഷിച്ചത്. പിന്നീട് ഒന്നാം ലോകമഹായുദ്ധക്കാലത്ത് ബ്രിട്ടീഷ് റെഡ് ക്രോസിൽ പരിചാരകയായി വയലറ്റ് സേവനമനുഷ്ടിച്ചിരുന്നു. ഇതിന്റെ ഭാഗമായി വയലറ്റിനെ എച്ച്.എം.എച്ച്.എസ് ബ്രിട്ടാനിക്കിൽ നിയോഗിച്ചു. 1916 നവംബർ 14ന് ഈജിയൻ കടലിൽ വച്ച് ഒരു മൈനിൽ ഇടിച്ച് ബ്രിട്ടാനിക് പൊട്ടിത്തെറിച്ചു. ഇത്തവണ തലയ്‌ക്ക് ഗുരുതരമായി പരിക്കേറ്റ വയലറ്റ് കഷ്ടിച്ചാണ് രക്ഷപ്പെട്ടത്.